داخوازا ڤه‌كرنا هێله‌كا ئاسمانی دناڤبه‌را هه‌ولێر و دیاربه‌كر دا دهێته كرن
دهۆك، له‌زگین جوقی:
سه‌رۆكێ ژورا بازرگانی و پێشه‌سازیا دهۆكێ دیار كر:” پێشنیاز دگه‌ل توركیا هاتیه كرن هێلا ئاسمانی دناڤبه‌را فرۆكخانا هه‌ولێر و دیاربه‌كر دا هه‌بیت، بۆ هندێ ئاسانكاری دناڤبه‌را بازرگانان دا بهێـته كرن، هه‌كه ئه‌ڤ هێلا ئاسمانی هاته ڤه‌كرن دێ بۆ كه‌رتی گه‌شتوگوزارێ و بازرگانان باش بیت و دێ هاتن و چوون ئاسانتر بیت، ئه‌ڤ پێشنیازه د چارچووڤێ پێشانگه‌ها گه‌شتیاری و خوارنێ یا میزوپوتامیا دا ل باژێری ئامه‌دێ، ئه‌وا ل رۆژا 24/3/2022ێ هاتیه ڤه‌كرن ژلایێ ئومید خوشناو پارێزگارێ هه‌ولێر ڤه هاتیه كرن”.
ئه‌یاد حه‌سه‌ن سه‌رۆكێ ژورا بازرگانیی و پێشه‌سازیا دهۆكێ بۆ ئه‌ڤرۆ دیار كر، بزاڤا بازرگانی دگه‌ل ده‌وله‌تان ب شێوه‌یه‌كێ باش بلندبوویه كو بازرگانێن دهۆكێ پتریا كه‌ره‌ستان ژ توركیا دئیننه دناڤ دهۆكێ دا كو شه‌رێ ئوكرانیا و روسیا بوویه ئه‌گه‌ر ئه‌و كومپانیێن راسته‌وخۆ دگه‌ل ئوكرانیا و روسیا كاردكه‌ن، نوكه كارێ وان ب زه‌حمه‌ت كه‌ڤتیه، هه‌روه‌سا كارگه‌هێن توركیا یێن كه‌ره‌ستان ژ ئوكرانیا و روسیا ئیناین ل توركیا ب خوه ژی ئه‌و كه‌ره‌سته گران بووینه، لێ بازرگانێن مه ب هه‌موو شێوه‌یان پشته‌ڤانی كرینه و نه‌هێلاینه بها د بازاری دا گه‌له‌ك گران بیت كو ڤه‌گوهاستن و بهایێ پترولی ژی كارتێكرن ل سه‌ر كارێ بازرگانان كریه، ئه‌م پتر كه‌ره‌ستان هاورده دكه‌ین، ده‌مێ ژێده‌ر گران دبیت كارتێكرن لێ دبیت”.
ئه‌یاد حه‌سه‌ن گۆت ژی: ل دهۆكێ تیمێن چاڤدێری هاتینه پێكئینان به‌رده‌وام دووڤچوونا ره‌وشا بازاری دكه‌ن، ئه‌و بهایێ هاتیه دانان رێك ناهێته دان بها بلندتر بیت، دا كو د بازاری دا گرانی دروست نه‌بیت، نوكه ژی هه‌ڤركی دناڤبه‌را بازرگانێن دهۆكێ دا چێبوویه، هه‌ر ئێك زووتر كه‌ره‌ستێن خوه یێ خوارنێ و ڤه‌خوارنێ و ناڤمالی بفروشیت نه‌میننه دناڤ كۆگه‌هان دا، چونكو هه‌كه بمینن دێ ئێكسپایه‌ر بن و دێ زیان گه‌هیته بازرگانی، له‌ورا ژی بازرگان هه‌ولدده‌ن كه‌ره‌ستێن خوارنێ زوو بفروشن “.
ئاماژه دا وێ چه‌ندێ ژی، سنورێن مه دبه‌رفرهن دگه‌ل هه‌موو ده‌وله‌تێن ده‌وروبه‌رێن هه‌رێما كوردستانێ، ب تایبه‌تی ژی دگه‌ل عیراقێ كو ژ به‌سره و ئیران و سوریا و ئوردن بازرگانێن مه شیاینه خۆ بگه‌هیننه هه‌موو جهان و كاربكه‌ن، هه‌تا نوكه بازرگانێن مه ژ ئوروپا و ده‌وله‌تێن ئاسیا كه‌ره‌ستێن خوارنێ و ڤه‌خوارنێ و ناڤمالی و بیناسازی و پیشه‌سازی دهێنه د دهۆكێ دا، ب تایبه‌تی ژی ده‌وله‌تا ئه‌ندونوسیا و مالیزیا و كه‌ندا، ئه‌ڤه بوویه ئه‌گه‌ر هیچ كارتێكرن ل بازاری نه‌بیت، هه‌موو تشت دناڤ بازاری دا هه‌بیت و چو بوشاتی په‌یدانه‌بوویه، ئه‌و رێژا گران ژی بیت ل هه‌موو ده‌وله‌تان گران بوویه، بۆ نموونه ل توركیا، چونكو زه‌یت پتر ژ ئوكرانیا دهات و گه‌نم بۆ ئاری ژ روسیا و ئوكرانیا دهات، هنده‌ك كه‌ره‌سته ژبه‌ر شه‌رێ ئوكرانیا و روسیا گران بووینه و ل پارێزگه‌ها دهۆكێ دوو كارگه‌هێن زه‌یتی هه‌نه به‌رده‌وام كاری خۆ ئه‌نجام دده‌ن و كارگه‌هێن زه‌یتا زه‌یتونان ژی ل دهۆكی یێن هاتینه دانان”.
