جڤاتا پارێزگه‌ها دهۆكێ ل دۆر ئاریشه‌یێن پانزین و غاز و ئاهێن خوارنێ كۆمبوو
ئه‌ڤرۆ، نه‌وزاد هلۆری:
جڤاتا پارێزگه‌ها دهۆكێ ل گه‌ل ئالیێن شوله‌ژێ ل دۆر چاره‌سه‌ركرنا چه‌ندین پرسێن گرێدای ژیانا وه‌لاتیان، مینا: پانزین و غاز و ئاهێن خوارنێ كۆمبوو.
هوشیار گولی، سه‌رۆكێ فراكسۆنا پارتی ل جڤاتا پارێزگه‌ها دهۆكێ بۆ ئه‌ڤرۆ گۆت: (ب مه‌ره‌ما دیتنا چاره‌سه‌ریه‌كا گونجای بۆ بابه‌تێن گرێدای ژیانا رۆژانه یا وه‌لاتیان، ب تایبه‌تی پانزین و غاز و ئاهێن خوارنێ، دوهی جڤاتا پارێزگه‌ها دهۆكێ ب مێهڤانداریا ئالیێن شوله‌ژێ كۆمبوونه‌كا تایبه‌ت ئه‌نجام دا و تێدا ب تێر و ته‌سه‌لی به‌حس ل ئاریشه‌یێن پانزین و غاز و ئاهێن خوارنێ هاته كرن).
زێده‌تر گۆت: (ل پارێزگه‌ها دهۆكێ عمبارێن تایبه‌ت یێن هه‌لگرتنا غاز و پانزینێ نینن، كو پشكا پارێزگه‌هێ یا زێده تێدا بهێته هه‌لگرتن بۆ ده‌مێ پێدڤی، دیسا پشكا غازێ، كو ل پارێزگه‌ها سلێمانیێ بۆ پارێزگه‌ها دهۆكێ دهێت، یا كێمه، ب تایبه‌تی پشتی كو هه‌ژماره‌كا زۆر یا ئاواره و په‌نابه‌ران ل سنوورێ پارێزگه‌ها دهۆكێ هاتینه ئاكنجیكرن، ئه‌م دخوازین پشكا پارێزگه‌هێ بهێته زێده‌كرن و عمبارێن پێدڤی ژی بهێنه چێكرن، سه‌باره‌ت پشكا ئاهێن خوارنێ ژی دڤێت هه‌ماهه‌نگیێن زێده‌تر د ناڤبه‌را حوكمه‌تا هه‌رێما كوردستانێ و حوكمه‌تا ناڤه‌ندی یا ئیراقێ دا بهێنه دروستكرن بۆ وێ یه‌كێ چو ئاریشه بۆ وه‌لاتیان دروست نه‌بن و ئاهێن خوارنێ د ده‌مێ خوه دا بگه‌هنه وان).
فه‌هیم عه‌بدوللا، سه‌رۆكێ جڤاتا پارێزگه‌ها دهۆكێ د كۆنگره‌یه‌كێ رۆژنامه‌ڤانی دا گۆت: (هه‌ر ئاریشه‌كا گرێدای ده‌ستهه‌لاتێن مه بیت وه‌كو كارگێریا حوكمه‌تا خوه‌جهی یا پارێزگه‌ها دهۆكێ، دێ بزاڤان كه‌ین بهێته چاره‌سه‌ركرن، دیسا ئه‌وێن گرێدای ده‌ستهه‌لاتا حوكمه‌تا هه‌رێما كوردستانێ و حوكمه‌تا ئیراقێ ڤه ب تایبه‌تی ئاهێن خوارنێ و سۆته‌مه‌نی ب گشتی دێ مێهڤانداریا ئه‌ندامێن په‌رله‌مانێ كوردستانێ و ئیراقێ كه‌ین بۆ وێ یه‌كێ بشێین چاره‌سه‌ریه‌كا گونجای بۆ ببینین).
محسن ته‌ها، رێڤه‌به‌رێ سۆته‌مه‌نی و نه‌فت و كانزایان ل پارێزگه‌ها دهۆكێ د كۆنگرێ رۆژنامه‌ڤانی دا گۆت: (پشكا پانزینێ یا پارێزگه‌ها دهۆكێ ژ دو ژێده‌ران دهێت، 288 هزار لیتران حوكمه‌تا هه‌رێما كوردستانێ رۆژانه بۆ پارێزگه‌ها دهۆكێ دابین دكه‌ت، 216 هزار لیتر ژی ژ به‌غدا بۆ پارێزگه‌هێ دهێت، به‌لێ هه‌ر ده‌مێ ئاریشه‌یه‌ك ژ لایێ به‌غدا ڤه دروستبوو كارتێكرن ل سه‌ر پشكا هه‌رێما كوردستانێ و دهۆكێ ژی دكه‌ت، غاز رۆژانه دگه‌هیته دهۆكێ، لێ ئه‌ڤه سێ رۆژه رۆژانه هه‌شت تانكه‌رێن غازا خاڤ دگه‌هنه دهۆكێ و به‌ری نوكه حه‌فت دهاتن، ئه‌ڤ رێژه یا كێمه، ژ به‌ركو ژبلی خه‌لكێ خوه‌جه، مه گه‌له‌ك ئاواره و په‌نابه‌ر هه‌نه، حوكمه‌تا ئیراقێ و رێكخراوێن نێڤده‌وله‌تی چو هاریكاریا ئاواره و په‌نابه‌ران د ڤی بیاڤی دا ناكه‌ن).
