حوكمه‌ت كه‌لوپه‌لێن چاندنێ ب قست دێ ده‌ته جۆتیارێن زاخۆ
زاخۆ، عه‌لی حاجی:
رێڤه‌به‌رێ چاندنێ ل زاخۆ بۆ رۆژناما ئه‌ڤرۆ دیار كر، 168 جۆتیاران داخوازا كه‌لوپه‌لێن چاندنێ ب قست كری یه و بڕیاره پشتی جه‌ژنا ره‌مه‌زانا پیرۆز ئه‌ردێ چاندنێ ل ده‌ڤه‌رداریا باتیفا بهێته كوژاندن.
ئه‌حمه‌د سامی، رێڤه‌به‌رێ چاندنێ ل زاخۆ گۆت: “پشتی حكومه‌تا هه‌رێمێ پرۆژه‌یێ كه‌لوپه‌لێن چاندنێ راگه‌هاندی، ل سنوورێ ئیداره‌یا سه‌ربخوه یا زاخۆ 168 جۆتیاران داخوازا كه‌لوپه‌لێن چاندنێ ب قست، ب تایبه‌ت ته‌ره‌كتۆران كریه، د نوكه دا ناڤێ وان بۆ وه‌زاره‌تا چاندنێ هاتینه ره‌وانه‌كرن، ئه‌م چاڤه‌رێینه ناڤێن وان ل گه‌ل بهایێ وان كه‌لوپه‌لان بهێته ده‌ستنیشان كرن و بۆ رێڤه‌به‌ریا مه بهێنه ڤه‌گه‌ڕاندن، داكو جۆتیاران ئه‌و تشتێ داخواز كری وه‌ربگرن”
گۆتژی: “ئه‌ڤه پشته‌ڤانیه‌كا باشه ل جۆتیاران دهێته كرن، هه‌ر د به‌رده‌وامیا پشته‌ڤانیكرنا جۆتیاران دا، مه لژنه پێكئیناینه و رۆژانه سه‌ره‌دانا وان جۆتیاران دكه‌ن یێن گه‌نم چاندی، دا كو ژ نێزیك سه‌حكه‌نه به‌رهه‌مێ وان و گه‌نمێ هه‌ر جۆتیاره‌كی ژ ئه‌گه‌رێ هه‌بوونا سنكی زیان گه‌هشتبیتێ، ناڤێ وی دهێته تۆماركرن و ده‌رمانێ دژی سنكی بێ به‌رامبه‌ر ل سه‌ر هێته به‌لاڤكرن”.
ئه‌حمه‌د خویا ژی كر، گه‌له‌ك ئه‌ردێ چاندنێ ل ده‌ڤه‌رداریا باتیفا هه‌یه، كو چو به‌لگه‌یێن فه‌رمی وه‌لاتیان پێ نینن و گۆت: “ئه‌م پشتی جه‌ژنا ره‌مه‌زانا پیرۆز دێ مامه‌له‌یێن فه‌رمی بۆ وان ئه‌ردێن چاندنێ ل سنوورێ 22 گوندێن ده‌ڤه‌رداریا باتیفا دروست كه‌ین، داكو جۆتیار سودمه‌ند ببن و بشێن زێده‌تر وان ئه‌ردان بۆ چاندنێ ب كار بینن”.
