سندۆقا خانه‌نشینیا هونه‌رمه‌ندان دێ هێته دامه‌زراندن
هه‌ولێر، قائید میرۆ:
ئه‌ندامه‌كێ لژنا ره‌وشنبیری و لاوان ل په‌رله‌مانێ كوردستانێ ئاشكرا كر، ل گوره‌ی پڕۆژه‌قانوونه‌كێ سندۆقه‌ك بۆ خانه‌نشینێن هونه‌رمه‌ندان دێ هێته دامه‌زراندن و دبێژیت: پڕۆژه ئاراسته‌ی سه‌رۆكایه‌تیا په‌رله‌مانی هاتیه كرن و ل نێزیك دێ خواندنا ئێكێ بۆ هێته كرن.
محسن دۆسكی، ئه‌ندامێ لژنا ره‌وشنبیری و لاوان بۆ رۆژناما ئه‌ڤرۆ دیار كر، قانوونا سندۆقا خانه‌نشینیا هونه‌رمه‌ندان یا به‌رهه‌ڤه، كو خواندنا ئێكێ بۆ بهێته كرن و گۆت: “پرۆژه‌قانوون ئاراسته‌ی سه‌رۆكایه‌تیا په‌رله‌مانی هاتیه كرن، هه‌تا ده‌مه‌كێ نێزیك بكه‌ڤیته د ناڤا كارناما كۆمبوونا داهاتیا په‌رله‌مانێ كوردستانێ دا، به‌رهه‌ڤكرن و ده‌ركرنا قانوونا خانه‌نشینیا هونه‌رمه‌ندان ب مه‌ره‌ما خزمه‌تكرنا وانایه و هه‌مبه‌ر ئه‌ڤێ خه‌باتا هونه‌رمه‌ند پێشكێشی خه‌لكێ كوردستانێ و وه‌لاتێ خوه دكه‌ن”.
محسن دۆسكی گۆتژی:”ل گوره‌ی ئه‌ڤێ قانوونێ سندۆقه‌ك بۆ خانه‌نشینیا هونه‌رمه‌ندان دێ هێته دامه‌زراندن و ده‌سته‌كه‌ك بۆ برێڤه‌برنا سندۆقێ دێ هێته پێكئینان، كو نوونه‌رێن وه‌زاره‌تا ره‌وشنبیری و دارایی و سه‌ندیكا هونه‌رمه‌ندان تێدا بن، خانه‌نشینكرنا هونه‌رمه‌ندان ب زۆری نابیت ل سه‌ر ئه‌ڤێ سندۆقێ، به‌لێ هه‌ر هونه‌رمه‌نده‌ك ئه‌گه‌ر بخوازیت ئه‌ڤه دێ پشكداریێ كه‌ت و ل سه‌ر ئه‌ڤێ سندۆقێ دێ هێته خانه‌نشینكرن”.
