پتری شه‌ش هزار ته‌نێن ئاری دێ گه‌هنه هه‌رێما كوردستانێ
ئه‌ڤرۆ:
وه‌زاره‌تا بازرگانیا ئیراقێ هه‌تا نوكه ب تنێ 25%ێ یا به‌هرا ئێكێ یا ئارێ هه‌رێما كوردستانێ هنارتیه عمبارێن هه‌رێمێ و جێگرا سه‌رۆكا لژنا پیشه‌سازی ژی ئاشكرا كر، ل نێزیك ئارێ پێدڤی بۆ به‌لاڤكرنێ دێ گه‌هیته پارێزگه‌هێن هه‌رێما كوردستانێ.
گولیزار سندی، جێگرا سه‌رۆكا لژنا پیشه‌سازی ل په‌رله‌مانێ كوردستانێ بۆ ئاژانسا خانی دیار كر، ئارێ پێدڤی ژ لایێ حوكمه‌تا ئیراقێ ڤه ناگه‌هیته هه‌رێما كوردستانێ و ب تنێ 25%ێ یا به‌هرا ئارێ هه‌یڤا ئێك یا ئه‌ڤ ساله گه‌هشتیه پارێزگه‌هێن هه‌رێما كوردستانێ، ئه‌ڤه د ده‌مه‌كی دایه، ل باشوورێ ئیراقێ كار بۆ به‌لاڤكرنا به‌هرا سێیێ یا ئاری دهێته كرن.
گولیزارێ گۆتژی: “مه په‌یوه‌ندی ب وه‌زاره‌تا بازرگانیا ئیراقێ ڤه كریه و داخواز ژێ كریه، كو مینا پارێزگه‌هێن ناڤه‌ڕاست و باشوورێ ئیراقێ به‌هرا هه‌رێما كوردستانێ ژی بهێته هنارتن، بریكارێ وه‌زاره‌تا بازرگانیا ئیراقێ ئه‌م پشتڕاستكرینه، كو ئاره‌كێ زۆرێ ئوستڕالی گه‌هشتیه ئیراقێ و به‌هرا هه‌رێما كوردستانێ بۆ پارێزگه‌هێن هه‌ولێر و دهۆك و سلێمانیێ ژی زێده‌تری شه‌ش هزار ته‌نێن ئارینه و بۆ عمبارێن پارێزگه‌هێن هه‌رێمێ دێ هێته هنارتن”.