ل سایلۆیا گه‌نمێ هاورده ناهێته وه‌رگرتن
دهۆك، له‌زگین جوقی
رێڤه‌به‌رێ بازرگانیا ده‌خلۆدانێ ل دهۆكێ دیار كر:” به‌رهه‌ڤیێن وه‌رگرتنا گه‌نمێ جۆتیاران هاتنه كرن و بریار هاته دان ل سێ سایلۆیان ئه‌ڤ ساله گه‌نمێ جۆتیارێن دهۆكێ بهێته وه‌رگرتن و بنگه‌هێ رۆڤیا ئه‌ڤ ساله گه‌نمێ وه‌رناگریت”.
نازم مه‌حه‌مه‌د، رێڤه‌به‌رێ بازرگانیا ده‌خلۆدانێ ل دهۆكێ و رێڤه‌به‌ریا سایلویا فه‌یدیێ راگه‌هاند “هه‌ر جوتیاره‌كێ پشتی ئه‌نجامێن گه‌نمێ ده‌ركه‌ڤن هه‌كه ژ ئه‌نجامی نه‌یێ رازی بیت، دشێت سكالایێ تۆماربكه‌ن بۆ دووباره ئه‌نجامدانا پشكنینانا گه‌نمی ئه‌م چاڤه‌رێینه ناڤێن جۆتیاران بگه‌هن دا كو پرۆسه‌یا وه‌رگرتنا گه‌نمێ ده‌ست پێ بكه‌ت و نابیت گه‌نمێ خۆمالی دناڤبه‌را پارێزگه‌هان دا بهێـت و بچیت، ئانكو جوتیار نه‌شێت گه‌نمێ خۆ ژ پارێزگه‌هه‌كێ بۆ پارێزگه‌هه‌كا دێ ڤه‌گوهێزیت، هه‌تا ناڤ نه‌گه‌هن گه‌نم ژ جۆتیاران ناهێته وه‌رگرتن”.
ئاماژه دا وی چه‌ندی ژی:” ژبه‌ر هشكه‌سالیێ دێ ئاسانكاری بۆ جۆتیاران هێته كرن و به‌رهه‌مێ جۆتیاران وه‌كو پله ئێك دهێته وه‌رگرتن، ئه‌و جۆتیارێن گه‌نمێ وان نه‌یێ پاقژ ژی بیت دێ ده‌لیڤه پێ هێته دان بچیت پاقژ بكه‌ت. گه‌نمێ جۆتیاران بێ په‌سه‌ندێن رێڤه‌به‌ری و هوبێن چاندنێ ناهێته وه‌رگرتن و گۆت: گه‌نمێ هاوه‌رده ل سایلۆیان ناهێته وه‌رگرتن و لژنه هاتینه پێك ئێنان بۆ قه‌ده‌غه‌كرن و ده‌سته‌سه‌ركرنا گه‌نمێ هاوه‌رده، هه‌تا پرۆسیه‌یا وه‌رگرتنا گه‌نمێ جۆتیاران ب دووماهی دهێت”.
نازم مه‌حه‌مه‌د گۆت:” ئه‌و جۆتیارێ ره‌سیدی بفروشت دێ ناڤێ وی ژ پلانا ئه‌ڤ ساله هێته دوورخستن و نابیت جۆتیار ره‌سیدێ خۆ یێ گه‌نمێ بفروشن و بریار هاتیه دان د ماوێ وه‌رگرتنا گه‌نمی دا كاره‌ب ب گشتی بۆ سایلۆیان بهێته دان و رێكخستنا سرایا گه‌نمێ جۆتیاران دهێته كرن، بۆ ڤێ مه‌به‌ستێ ژی هاتن و چوون و پولیس و رێڤه‌به‌ریا رێك و پرا و باژێرڤانیێ دێ هه‌ڤكاریێ كه‌ن و هه‌موو ئاسانكاری بۆ جۆتیاران هێنه كرن بۆ ڤه‌گوهاستنا ئامیرێن دوورینا ده‌خلۆدانی”.
رێڤه‌به‌رێ بازرگانیا ده‌خلۆدانێ ل دهۆكێ خۆیا ژی كر: “ئه‌ڤ ساله سێ سایلۆ ل دهۆكێ دێ گه‌نمێ جۆتیاران وه‌رگرن، ئه‌و ژی سایلۆیا زاخۆ و سایلۆیا فه‌یدیێ و سایلۆیا شێخان و ئه‌ڤ ساله ل بنگه‌هێ روڤیا گه‌نمێ جۆتیاران ناهێته وه‌رگرتن و ئه‌ڤ ساله دێ هه‌موو گه‌نمێ جۆتیاران دهێته وه‌رگرتن، هه‌روه‌سا ژی هه‌موو ئاسانكاری بۆ وه‌رگرتنا گه‌نمێ جۆتیاران دهێنه كرن”.
ته‌كه‌ستكر :”ئه‌ڤ ساله سێ سایلۆ ل دهۆكێ یێن هاتینه ده‌ستووردان بۆ وه‌رگرتنا گه‌نمێ جۆتیاران، ئه‌و ژی سایلۆیا زاخۆ شیانێن وه‌رگرتنا 15 هزار ته‌نێن گه‌نمی هه‌نه و سایلۆیا شێخان شێانێن وه‌رگرتنا 60 هزار ته‌نێن گه‌نمی هه‌نه و سایلۆیا فه‌یدیێ ژی شیانێن وه‌رگرتنا 30 هزار ته‌نێن گه‌نمی هه‌نه”.
