شاخه‌وان عه‌بدوللا:قانوونا ئاسایشا خۆراكی د به‌رژه‌وه‌ندیا كوردان ژی دایه
ئه‌ڤرۆ:
جێگرێ سه‌رۆكێ جڤاتا نوونه‌رێن ئیراقێ راگه‌هاند، كورد ب شێوه‌كێ گشتی تنێ ژ بودجا گه‌شه‌پێدانا پارێزگه‌هان د قانوونا ئاسایشا خۆراكی د مفادار نینن، ئه‌گه‌ر نه ژ یێن دی هه‌موویان د مفادارن، وه‌كو پشكا خۆراكێ هه‌یڤانه و قه‌رێن جوتیاران و ڤه‌گه‌راندنا ئه‌فسه‌ر و پۆلیسان كو رێزێن له‌شكری بجه هێلابوون و نوكه دشێن بزڤرن و هه‌روه‌سا پشته‌ڤانیكرنا زێره‌ڤانێن سنووری و هاریكاریكرنا رزگاركریێن ژ ده‌ستێ داعشێ.
شاخه‌وان عه‌بدوللا، جێگرێ سه‌رۆكێ جڤاتا نوونه‌رێن ئیراقێ گۆت” په‌سه‌ندكرنا پرۆژێ قانوونا ئاسایشا خۆراكی ب شێوه‌كێ گشتی د به‌رژه‌وه‌ندیا كوردان ژی دایه، كو ژوان پارێ جوتیارێن هه‌رێما كوردستانێ كو چه‌ندین ساله نه‌هاتیه دان و نوكه تێدا هاتیه جهگیركرن كو بهێته دان كو هه‌تا رۆژا ده‌نگدانێ ژی تێدا نه‌بوو، به‌لێ مه ل سه‌ر پرۆژێ قانوونێ زێده‌كر و پارێ جوتیاران ب تمامی دێ هێته دان، هه‌روه‌سا ژ پارێ پشكا خۆراكی هه‌یڤانه كو پێنج ترلیۆن دینار تێدایه هه‌موو دێ مفادار بن و ژ پشته‌ڤانیگرنا پۆلیسێن سنووری كو ئه‌م ژی د مفادارین ژێ و 25 ملیار ژی بۆ رزگاربوویێن ژ ده‌ستێ داعشێ هاتینه دانان، كو ئه‌و ل سه‌ر پێشنیازا پارتی بوو و ل رۆژا ده‌نگدانێ ل سه‌ر پرۆژه قانوونێ ل سه‌ر سه‌گۆیێ كۆمبوونا جڤاتا نوونه‌ران مه ل سه‌ر زێده‌كر و گۆژمێ 50 ملیار دینار هاتینه ته‌رخانكرن بۆ ئاوارێن هه‌رێمێ و هه‌موو ئه‌و ئه‌فسه‌ر و پۆلیسێن كورد یێن كو ل رێزێن له‌شكری بوون و ب هه‌ر ئه‌گه‌ره‌كی نه‌مابوون دناڤدا دشێن د چارچۆڤێ ته‌رخانكرنا 400 ملیار دیناران بزڤرن بۆ جهێن خوه”.
شاخه‌وان عه‌بدوللا خویاكر ژی” ئه‌و پارێ بۆ كاره‌بێ هاتیه دانان ئه‌م ژی ل ده‌ڤه‌رێن كوردستانێ دێ ژێ د مفادار بین وه‌كو كوردێن وان ده‌ڤه‌ران ل كه‌ركووك و مووسل و دیالا، ئه‌وا مفا تێدا نه‌بیت بودجا گه‌شه‌پێدانا پارێزگه‌هانه، كوپ شكا هه‌رێمێ نه‌هاتیه دانان و ل كه‌ركووكێ مه ب سه‌دان گرێبه‌ست یێن هه‌ین كو 90% گرێبه‌ستێن پۆلیسێن په‌ترۆلێ كوردن و ل باژێرێن دی ژی مه گرێبه‌ست یێن هه‌ین كو ژ وێ چه‌ندێ ژی كورد دێ مفای ژێ وه‌رگرن، له‌وما داخوازا مه ئه‌وبوو بودجا گه‌شه‌پێدانا پارێزگه‌هان ژ ده‌رڤه‌ی بودجه‌ی بیت و هه‌تا 2014 ژی وه‌سا بوو، ئانكو پێدڤی بوو پرۆژێن هه‌رێمێ ژی د وی پرۆژه قانوونێ دا هه‌بان و بۆ هاتبوو هنارتن ژی به‌لێ ئه‌و زێده‌نه‌كر، ئه‌م ژی وه‌كو سه‌ركردایه‌تیا خوه دیتنا مه ئه‌وبوو ژ وان هه‌موو خالێن مه باسكرین دمفادارین بلا نه‌بینه رێگر ژ ده‌ركرنا وێ پرۆژه قانوونێ، كوس وباهی خۆراك گران بیت و دشیان دا نه‌بیت بهێته دابینكرن، له‌وما ب شێوه‌كێ گشتی كورد ژی ژ وێ پرۆه قانوونێ د مفادارن”.
