حوكمه‌تا هه‌رێمێ دێ سێ پڕۆژه‌یێن گرنگێن ساخله‌میێ ل زاخۆ ئه‌نجام ده‌ت
زاخۆ، عه‌لی حاجی:
ب گوژمێ 700 ملیۆن دیناران نه‌خۆشخانه‌یا ته‌نگاڤیان ل ئیداره‌یا سه‌ربخوه یا زاخۆ هاته نووژه‌كرن و به‌رفره‌هكرن و دوهی 21/8/2022 هاته ڤه‌كرن و كه‌فته د خزمه‌تا وه‌لاتیان دا.
دكتۆر شاكر عه‌بدولره‌حمان، رێڤه‌به‌رێ ساخله‌میا زاخۆ گۆت: “نه‌خۆشخانه‌یا ته‌نگاڤیان ل زاخۆ پێدڤی ب نووژه‌نكرنێ هه‌بوو، له‌وما ب بزاڤێن به‌رده‌وام یێن ئیداره‌یا سه‌ربخوه یا زاخۆ و ب پشته‌ڤانیا مه‌سرور بارزانی، سه‌رۆكێ حكومه‌تا هه‌رێما كوردستانێ ئه‌ڤ نه‌خۆشخانه ب گوژمێ 700 ملیۆن دیناران ب شێوه‌یه‌كێ سه‌رده‌میانه هاته نووژه‌نكرن و به‌رفره‌هكرن و هه‌ژماره‌یه‌كا ئامیرێن نوو ژی بۆ هاتنه دانان، زێده‌باری هندێ ژی هنده‌ك پشكێن نوو ژی د ناڤ ڤێ نه‌خوشخانه‌یێ دا هاتنه ڤه‌كرن، ئێدی ئه‌ڤ نه‌خۆشخانه دێ د خزمه‌تا وه‌لاتیان دا بیت ب شێوه‌یه‌كێ گه‌له‌ك باش، دیسا هه‌ژماره‌یا ته‌ختان د ناڤ ڤێ نه‌خۆشخانێ ژی دا هاتنه زێده‌كرن بۆ 60 ته‌ختان”.
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ د رێوره‌سمێن ڤه‌كرنا نه‌خۆشخانا ته‌نگاڤیان دا گۆت: “چه‌ندین پڕۆژه‌یێن دیتر ژی یێن كه‌رتێ ساخله‌میێ د بیاڤێ بجهئینانێ دانه، بۆ نموونه: هه‌موو بنگه‌هێن ساخله‌میێ یێن سه‌ر ب رێڤه‌به‌ریا ساخله‌میا زاخۆ ڤه دێ هێنه نووژه‌نكرن، د ده‌مه‌كێ نێزیك ژی دا به‌رێ بنیاتی بۆ ئاڤاكرنا نه‌خۆشخانه‌یا په‌نجه‌شێرێ و نه‌خۆشخانه‌یا زارۆكبوونێ دێ هێنه دانان، دیسا به‌رێ بنیاتی بۆ ئاڤاكرنا نه‌خۆشخانه‌یا گشتی ل ده‌ڤه‌رداریا باتیفا ژی دێ هێته دانان و ب هه‌ماهه‌نگی ل گه‌ل رێڤه‌به‌ریا ساخله‌میا گشتی یا دهۆكێ دێ كار بۆ دانانا میلاكێ دروست یێ نه‌خۆشخانه‌یا په‌نجه‌شێرێ ل زاخۆ كه‌ین، ئه‌وا د شیان دا بیت ژ بۆ پێشئێخستنا كه‌رتێ ساخله‌میێ ل سنوورێ ئیداره‌یا سه‌ربخوه یا زاخۆ دێ كه‌ین”.
