جڤاتا بلند یا دادوه‌ری و دادگه‌ها فیدرالی ل ئیراقێ كارێن خوه راگرتن
ئه‌ڤرۆ:
جڤاتا بلند یا دادوه‌ری و دادگه‌ها بلند یا فیدرالی ل ئیراقێ بریا ردا هه‌موو كارێن خوه و دادگه‌هێن په‌یوه‌ندیدار رابگرن، ژ ئه‌گه‌رێ مانگرتنا لایه‌نگرێن موقته‌دا سه‌در ل به‌رده‌م باره‌گایێ وێ جڤاتێ و ئه‌نجامێن وێ ره‌وشێ ژی دئێخنه ستوویێ حوكمه‌تێ و ئه‌و ئالیێن سیاسی یێن پشته‌ڤانیێ ل مانگرتنێ دكه‌ن.
جڤاتا بلند یا دادوه‌ری ل ئیراقێ د به‌یاننامه‌ك به‌لاڤكر و تێدا ئاماژه ب وێ چه‌ندێ كریه، ل گه‌ل دادگه‌ها بلند یا فیدرالی كۆمبوویه بۆ باسكرنا پرسا مانگرتنا لایه‌نگرێن ره‌وتێ سه‌دری ل به‌رده‌م باره‌گه‌هێ جڤاتا دادوه‌ری ل دۆر بریارا جڤاتا نوونه‌رێن ئیراقێ و دبێژیت” ب رێیا نامێن ته‌له‌فۆنی گه‌ف هاتینه كرن بۆ فشارخستنێ ل سه‌ر دادگه‌هێ”.
ب گۆره‌ی وێ به‌یاننامێ، بریار هاته دان كارێن جڤاتا بلند یا دادوه‌ری و دادگه‌ها بلند یا فیدرالی ل ئیراقێ و دادگه‌هێن په‌یوه‌ندیدار رابگرن به‌رانبه‌ر وان ره‌فتارێن نه دستووری و نه قانوونی یێن هاتینه كرن.
جڤاتا بلند یا دادوه‌ری وێ ره‌وشێ دئێخیته ستوویێ حوكمه‌تا ئیراقێ و ئه‌و ئالیێن سیاسی یێن پشته‌ڤانیێ ل وێ گاڤێ دكه‌ن.
ژ ئالیێ خوه‌ڤه، نڤیسینگه‌ها راگه‌هاندنا سه‌رۆك وه‌زیرین ئیراقێ، مسته‌فا كازمی، هوشداریا وێ چه‌ندێ دا كو تێكدانا كارێ ده‌زگه‌هێ دادوه‌ریێ وه‌لاتێ دئێخیته به‌رده‌م مه‌ترسیه‌كا راسته‌قینه.
دووپاتكر ژی كو مافێ خوه‌نیشادانێ ب گۆره‌ی دستووری هاتیه گره‌نتیكرن، ل گه‌ل پێدڤیا رێزگرتنێ ل ده‌زگه‌هێن ده‌وله‌تێ بۆ به‌رده‌وامبوونێ ل كارێن خوه د خزمه‌تا خه‌لكیدا.
هه‌روه‌سا سه‌رۆك وه‌زیرێن ئیراقێ داخواز ژ هه‌موو ئالیێن سیاسی یێن ئیراقی كر ئارامیێ رابگرن و ده‌لیڤێ بۆ دانوستاندنێن نیشتمانی ببینن، بۆ وێ چه‌ندێ ئیراق ژ قه‌یرانا نوكه ده‌رباز ببیت.
ل رۆژا سێشه‌مبی 23 ئاب 2022، لایه‌نگرێن ره‌وتێ سه‌دری مانگرتنا خوه بره به‌رده‌م باره‌گه‌هێ جڤاتا بلند یا دادوه‌ری و دخواز دكه‌ن جڤاتا نوونه‌رێن ئیراقێ بهێته هه‌لوه‌شاندن.
