ئهڤه سالهكه چاڤهڕێ سۆزا رێڤهبهرێ گشتی یێ وهرزشی نه
ئهڤرۆ،
سهرۆكێ یانا باتیفا یا وهرزشی دیاركر ئهڤه بۆ ماوێ سالهكه چاڤهڕێ سۆزا د. شاكر سمۆ رێڤهبهرێ گشتی یێ وهرزشی ل ههرێما كوردستانێ نه و پشتهڤانیا ئیدارا سهربهخۆیا زاخۆ نه ژبهركو ب بهریكا ڤالان مه شیانێن پشكداریا چو چالاكییان نینن.
زێدهتر ئهیههم جامی بۆ رۆژناما ئهڤرۆ گۆت: ئهو دهمێ یانا باتیفا هاتیه دامهزراندن رێڤهبهرێ گشتی یێ وهرزشی ل ههرێمێ سۆز دا بوو كارگێریێ كو دێ ب كۆژمێ 46 ملیۆن دیناران ل گهل كرییا سالهكێ یا ئاڤاهیێ یانێ بۆ مه دابینكهن لێ ئهڤه زێدهتری سالهكه ئهو سۆز بجه نههاتیه و ژلایهكێ دووڤه بهرێز گۆهدار شێخۆ سهرپهرشتێ ئیدارا زاخۆ سۆزهك ل گهل مه گۆتبوو كو ههیڤانه كۆژمهكێ پارهیی پێخهمهت بڕێڤهبرنا تیمێن خوه د ماوێ چالاكیان دا مهزێخیت لێ مخابن چو ژ سۆزدا بجه نههاتیه و رهوشا یانێ گهلهك یا خرابه ژ روویێ دارایی ڤه و زهرهمهندێن ئێكێ دێ گهنچ و لاوێن دهڤهرێ بیت ژبهركو پشت بهستنا یانێ ب كوڕێن باتیفایه و یانا ئێكانه ل دهڤهرێ یه پشتهڤانیا گهنجێن خوه دكهت.
ههروهسان ناڤهاتی دیاركر بڤی دهست و داری مه ئهو شیان نینن پشكداری چو چالاكیان بیت تایبهت ئهم بهرههڤیا بۆ وهرزێ نوو یێ خولا پلا ئێك و دو یێن كوردستانێ دكهین سهر ئاستێ لاوان و پێشكهفتیان و گۆت: لهورا ئهم چاڤهڕێ سۆزهكێ نه هیڤیا مه ئهوه گهنجێن مه بێ ئۆمێد نهكهن.
