زاخۆ چار یاریزان دوورخستن و دو ئینان
ئهڤرۆ،زاخۆ، عهلی حاج:
د داخویانیهكێ دا رێڤهبهرێ تیما تهپا پێی یا زاخۆ ئهوا پشكدار د خولا نایابا ئێراقێ دا دیاركر د كهمپێ راهێنانێ دا چار یاریزان هاتینه دوورخستن و كێماسی ل هندهك جهان ههنه بهری دهستپێكرنا خولێ هێنه پڕكرن.
زێدهتر نهعمان عهلی بۆ رۆژناما ئهڤرۆ گۆت: كهمپێ ههولێرێ گهلهك یێ مفا بوو ژبهركو ئاستێ راستهقینه یێ یاریزانان دیار بوو لهورا یاریزانێن ل ئاستێ پێدڤی نه هاتنه دوورخستن و گههشتینه چار یاریزانا ئهوژی یێ سوری باهوز، عهلی بههجهت، ئهحمهد عهلی و حهسهن هادی، بۆ پركرنا جهێ وان گرێبهستا دو یاریزانان هاتینه كرن ئهو ژی مهنار تهها و فهلاح تهقی و ههردیسان پێشهكارهكێ بهرازیلی د ڕێ دایه ل نێزیك دێ گههیته تیمێ، ههر یاریزانهكێ مفایی ژێ نهبینین دێ هێته دوورخستن، د كهمپێ راهێنهرێ رۆژانه سێ یهكهیێن راهێنانێ دكرن و نوكه بووینه دو یهكه و دو یاریێن ههڤالینی ژی هاتینه ئهنجامدان و چاڤهڕێ یه دو یاریێن د ژی بهێنه ئهنجامدان ژبۆ چارهسهكرنا كێماسیێن تیمێ بهردهوامین ل سهر پڕكرنا وان جهان ژبهركو ههتا نوكه مه تیمهكا باش بهرههڤ كریه و ب پركرنا وان كێماسیان دێ تیما مه باشتر بیت.
ههروهسان ناڤهاتی گۆت: د كهمپێ راهێنانێ دا كار ژ گهلهك لایانڤه كری نه وهكو باشتركرنا جهستهیێ یاریزانان و پلان و تهكتیكا راهێنهری و گهلهك لایهنێن دیتر ژی و دشێم بشێم ههتا نوكه كهمپا مه ب شێوهیهكێ باش و سهركهفتی دهبازبوویه و پشتی ئهنجام دانا دو یاریێن دی یێن ههڤالینی دێ دووماهیێ ب كهمپێ خوه یێ راهێنانێ ئینین .
