پێنچ یاریزانێن دهۆكێ دێ پشكداری سێ قاره‌مانیێن نێڤده‌وله‌تی بن
ئه‌ڤرۆ،
دهێته چاڤه‌ڕێ كرن پێنچ یاریزانێن پارێزگه‌هێ و یانا دهۆك بۆ یاریا پایسكلان پشكداری سێ قاره‌مانیێن نێڤده‌وله‌تی بكه‌ن ئه‌وا دێ هه‌ڤڕكیێن وان هه‌ر 26ێ ڤێ هه‌یڤێ هه‌تا دووماهیا چڕیا ئێكێ یا بهێت به‌رده‌وامبن.
تارق سه‌عید راهێنه‌رێ یانا دهۆك و یاریزانان بۆ رۆژناما ئه‌ڤرۆ گۆت: ب شانازیڤه پێنچ یاریزانێن مه دێ ب ناڤێ هه‌لبژارتیێ ئیراقێ و یانه‌كا دی پشكداریی قاره‌مانیێن نێڤده‌وله‌تی بن، ئه‌و ژی ل 26ێ ڤێ هه‌یڤێ یاریزانێ وه‌هبی سه‌دیق ل سه‌ر ئاستێ لاوان پشكداری قاره‌مانیا یانێن عه‌ره‌بی ل وه‌لاتێ سوریا بیت، هه‌روه‌سان ل سه‌ر ئاستێ هه‌لبژارتیێ ئیراقێ بۆ پێشكه‌فتیان هه‌ر ئێك ژ نه‌وزاد مسته‌فا، به‌ره‌ڤان قاسم و سه‌ربه‌ست عه‌بدوللا پشكداری قاره‌مانیا نێڤده‌وله‌تی رافتینگ ل وه‌لاتێ ئازه‌ربێجان كه‌ن ئه‌وا دێ دووماهیا ڤێ هه‌یڤێ هێته ئه‌نجامدان، ل سه‌ر ئاستێ لاوان بڕیاره هه‌ردو یاریزان سیداد سه‌لام و وه‌هبی سلێمان پشكداری قاره‌مانیا تڕاك یا تایبه‌ت بن ئه‌وا دێ ل ده‌ستپێكا چڕیا ئێكێ یا بهێت هه‌ڤڕكیێن وێ ل وه‌لاتێ مسرێ هێته ئه‌نجامدان.
هه‌روه‌سا ناڤهاتی ئه‌وچه‌نده ژی دیاركر كو پشكداریا پێنچ یاریزانێن پارێزگه‌هێ د قاره‌مانیێن نێڤده‌وله‌تی دا ڕامانا وێ هه‌بوونا یاریزانێن خودان شیانن، لێ هه‌مبه‌ری وێ پێدڤی ب پشته‌ڤانیێ هه‌نه كو بشێن به‌رده‌وامیێ بده‌نه ئاست و پێشكه‌فتنا خوه د هه‌ر قاره‌مانیه‌كێ دا، له‌ورا هیڤییا مه ئه‌وه ژ لایه‌نێن به‌رپرس پشته‌ڤانیا یاریزانان بكه‌ن و ئه‌و بنیاته‌تێ مه دانایی پێخه‌مه‌ت پێشخستنا ڤێ وه‌رزشی و هه‌ڤڕكی به‌ر ب پلێن مه‌زنتر بچین.
