كۆڤان حه‌سه‌ن دو میدالیێن برۆنزی د قاره‌مانیا نێڤده‌وله‌تی دا ب ده‌ستڤه‌ئینا
ئه‌ڤرۆ،
یاریزانێ هه‌لبژارتیێ ئیراقێ و كوڕێ پارێزگه‌ها دهۆكێ كوڤان حه‌سه‌ن شیا دو میدالیێن برۆنزی د قاره‌مانیا نێڤده‌وله‌تی دا بۆ خه‌لاتێ مه‌زن یا یاریێن مه‌یدانێ بۆ خودانێن پێدڤیێن تایبه‌ت ده‌ستڤه بینت، پشتی بۆ یاریێن هاڤێتنا رۆمی F41 و هاڤێتنا پارسه‌نگی F40 رێزێن سێیێ ب ده‌ستڤه بینت د هه‌ڤڕكیێن واندا ئه‌وا 400 یاریزان ژ 40 وه‌لاتێن، ئاسیا، ئه‌فریقیا، ئۆرۆپا،ئه‌مریكا باكۆر و باشۆر ل باژێرێ مه‌راكش یێ وه‌لاتێ مه‌غرب هایته كرن.
زێده‌باری هه‌ردو میدالیێن كۆڤان حه‌سه‌ن هه‌لبژارتیێ ئیراقێ 16 میدالیێن ره‌نگین وه‌رگرتن ئه‌و ژی، شه‌ش میدالیێن زێری، هه‌شت یێن زیڤی و دو یێن برۆنزی ده‌ستخوه‌ڤه ئیناین.
كۆڤان حه‌سه‌ن قاره‌مانێ ئۆلمپیادا به‌رازیل بۆ رۆژناما ئه‌ڤرۆ گۆت: هه‌رچه‌نده ئه‌نجامێن ڤێ قاره‌مانیێ ل دووڤ هیڤییا من نه بوون كو ئارمانجا من زێر بوو نه‌ك برۆنزی لێ ئه‌ڤه دێ بیته باشترین به‌رهه‌ڤی بۆ دو قاره‌مانیێن دی یێن مه‌زن یێن نێڤده‌وله‌تی ل چینێ و فره‌نسا له‌وما بۆ داهاتی دێ راهێنانێن من ب شێوه‌كێ دی بن و باشتربن و ئه‌ز پێدڤی ب پشته‌ڤانیێ مه، هیڤییا من ئه‌وه پارێزگارێ دهۆكێ پشته‌ڤانیا من وه‌كو جاران بكه‌ت دا بشێم ناسناڤه‌كێ ده‌وله‌تی وه‌كو یاریزانه‌كێ كوڕد و خه‌لكێ پارێزگه‌هێ ده‌ستڤه بینم.
ناڤهاتی دیاركر ئه‌و یاریزانێ یاریێن مه‌یدانێ یه بۆ سێ یاریان ئه‌و ژی هاڤێتنا رومی، تلپێ و هاڤێتنا پارسه‌نگی، لێ زێده‌تر پشت به‌ستن ل سه‌ر هاڤێتنا رۆمی دكه‌م و هه‌موو شیانێن خوه د مه‌زێخم دۆباره ده‌ستكه‌فتێ ئۆلمپیادا به‌رزایلێ ڤه‌گه‌ڕینم سه‌رباری ئه‌ڤه هه‌موو ب گۆتن نابیت به‌لكو پشته‌ڤانی و ماندیبوون.
بۆ زانین یاریزانێ ناڤهاتی كوردێ ئێكانیه د ناڤ پێكهاتیێ هه‌لبژارتیێ ئیراقێ یێ گۆره‌پانێ دا و شیایه زێده‌تر120 میدالیێن ره‌نگین د قاره‌مانیێن نێڤده‌وله‌تی، ئه‌ره‌بی و جیهانی بده‌ستڤه بینت ژوانا ده‌ستكه‌فتا ئۆلمپیادا ریۆ دی جانیرۆ یا 2016ێ ل به‌رازیل میدالیا زێری بۆ هاڤێتنا رۆمی كو ژدووراتیا 41م و 82سم تۆماربكه‌ت و میدالیێن زێری و زیڤی د قاره‌مانیێن نێڤده‌وله‌تی، ل لندن، چیك، قه‌ته‌ر و ئیماراتێ.
