پرۆتۆكولا وه‌رزشی یا بولگاری و نوونه‌راتیا دهۆكێ كه‌فته كاری
ئه‌ڤرۆ،
شانده‌كێ ئێكه‌تیا باسكێت بۆلا پارێزگه‌ها دهۆكێ ل وه‌لاتێ بۆلگاریا یه ژبۆ وه‌رگرتنا شاره‌زاهی و زانیاریان و چه‌ند ته‌وه‌رێن جودا ژبۆ ب جهئینانا پرۆتۆكولا د ناڤبه‌را نیكۆلایی ئیزۆڤ سه‌رۆكێ ڤاسێل لیڤێسكی ل بۆلگاریا و د. ئه‌حمه‌د قاسم سه‌رۆكێ كۆلیژا په‌روه‌رده‌یا چه‌سته‌یی و زانستێن وه‌رزشی و سه‌رۆكێ نوونه‌راتیا دهۆك یا لژنا ئۆلمپیا كوردستانێ ئه‌وێ به‌ری هه‌یڤه‌كێ ل وه‌لاتێ بۆلگاریا هاتیه ئیمزاكرن.
سه‌ردار سالح سه‌رۆك شاند و سه‌رۆكێ ئێكه‌تیا باسكێت بۆلا پارێزگه‌ها دهۆكێ ل گه‌ل دا عه‌لی محه‌مه‌د سكرتێرێ ئێكه‌تیێ و محه‌مه‌د نه‌بی ئه‌میندارێ دارایی پشكداری دیدارا ئێكێ یا پرۆتۆكێ بووینه ئه‌وێن دێ بۆ ماوێ حه‌فتیه‌كێ ل گه‌ل چه‌ند به‌رپرسێن وه‌رزشی، راهێنه‌ر و یاریزانێن شاره‌زا كۆمبن.
د داخویانیه‌كێ دا سه‌ردار سالح بۆ رۆژناما ئه‌ڤرۆ گۆت: ب جهئینانا پرۆتۆكۆلا دناڤبه‌را نوونه‌راتیا دهۆك یا لژنا ئۆلمپیا كوردستانێ ئه‌م وه‌كو ئێكه‌م ئێكه‌تیا وه‌رزشی ب شانده‌كێ ژ سێ كه‌سان سه‌ره‌دانا وه‌لاتێ بۆلگاریا كریه، ب مه‌ره‌ما وه‌رگرتنا پێزانینا و پشكداری وورك شۆپێن تایبه‌ت ل سه‌ر چاوانیا پێشڤه‌چوونا ئاستێ یاریا باسكێت بۆلێ ل پارێزگه‌هێ دیسان ل سه‌ر چار خالان مه مه‌ره‌ما هاتنا خوه بۆ لایه‌نێ بولگاریا به‌حسكریه ئه‌و ژی، ڤه‌كرنا خولێن راهێنانێ و بهێزكرنێ بۆ راهێنه‌رێن مه كو ژلایێ راهێنه‌رێن ئه‌وان یێن خودان شاره‌زا ل سه‌ر نێڤده‌وله‌تی چو ب هاتنا وان بۆ كوردستانێ یان یێن مه بهێنه بولگاریا ئه‌وان به‌رهه‌ڤیا خوه دیاركرن، یا دویێ مفا وه‌رگرتن ژ یاریزانێن بولگاری وه‌كو پیشه‌كار د خولا ئیراقێ و كوردستانێ دا كو ل دووڤ گرێبه‌ستێن گۆنجایی بن یانێن مه بشێن گرێبه‌ستێ ل گه‌ل ئیمزابكه‌ن، یا سێیێ بابه‌تێ هنارتنا ستاڤه‌كێ شاره‌زا یێ راهێنانێ بۆ ژیێن بچۆك بۆ كچ و كوڕان هه‌رده‌مێ یانه‌كا مه یا كوردستانی داخواز ژ مه‌كر ئه‌وان به‌رهه‌ڤیا خوه دیاركر، یا چارێ بابه‌تێ دابینكرنا كه‌مپێن راهێنانێ بۆ هه‌ر تیمه‌كا مه بهێته بولگاریا كو یا سه‌ركه‌فتی بیت و یا پێدڤی بۆ بهێته كرن.
هه‌روه‌سان ناڤهاتی دیاركر پشتی مه هه‌ر چوار خالێن خوه بۆ لایه‌نێ بولگاری پێشكێشكری ئه‌وان دیاركر كو دێ گه‌نگه‌شێ ل سه‌ر كه‌ن و كه‌یفخووشیا خوه دیاركر ب هاتنا مه و به‌رهه‌ڤن بۆ هه‌ر پێنگاڤه‌كا د به‌رژوه‌ندیا باسكێت بۆلا كوردستانێ و پارێزگه‌ها دهۆكێ دا بكه‌ن.
ل دووماهی سه‌ردار سالح سۆپاسیا سه‌رۆكێ نوونه‌راتیا دهۆكێ كر ئه‌وێ ئێك ژ مه‌زنترین پێنگاڤێن باش هاڤێتی بۆ پێشكه‌فتنا وه‌رزشی و هه‌موو یاریا ب گشتی و باسكێت بۆلێ ب تایبه‌ت و هیڤی خواست ئه‌ڤه ببیته پێنگاڤه‌كا ئه‌رێنی بۆ پاشه‌رۆژا وه‌رزشێ.
