زاخۆ نوونه‌را پارێزگه‌هێ یه و دهۆك پشكدار نابیت
ئه‌ڤرۆ، قه‌یس وه‌یس
فۆتۆ: ئازاد زووم
ئێكه‌تیا باسكێت بۆلا ئیراقێ پشككێشانا وه‌رزێ نوو یێ خولا پلا نایابا ئیراقێ ل باژێرێ به‌غدا ئه‌نجامدا ئه‌وا دێ ب پشكداریا 13 یانا بیت و یانا زاخۆ وه‌كو نوونه‌را پارێزگه‌ها دهۆكێ و كوردستانێ پشكداربیت هه‌مبه‌ری وێ یانا دهۆك بۆ وه‌رزێ سێیێ ل دووڤ ئێك پشكدار نابیت.
د ئه‌نجامێ پشككێشانێ دا یانا زاخۆ دێ ل یاریگه‌ها خوه مێڤانداریا سێ یاریان ل دووڤ ئێك كه‌ت و بڤی ره‌نگی، زاخۆ ل گه‌ل كاره‌با ئێكشه‌مبیا بهێت، زاخۆ كه‌رخ دووشه‌مبیا بهێت و یاریا سێیێ ل گه‌ل دیفاع ئه‌لجه‌وی رۆژا سێ شه‌مبی.
ل دور ڤێ یه‌كێ د. خالد نه‌جم سكرتێرێ ئێكه‌تیا باسكێت بۆلا ئیراقێ بۆ رۆژناما ئه‌ڤرۆ گۆت: وه‌رزێ نوو یێ خولا نایابا ئیراقێ دێ ب شێوه‌كێ جودا بیت و سیسته‌مه‌كێ نوو پێخه‌مه‌ت پێشخستنا وه‌رزشێ كو بڕیاره 13یه پشكداربن پشتی خوه‌ڤه‌كێشانا یانا دیوانیه و یاریێن وان ب شێوێ خول دو قۆناغ هێنه كرن ب سیسته‌مێ broken system ئانكۆ یاری به‌روڤاژی هاتنووچوونێ به‌لكۆ ل دووڤ شێوازێ رۆژانه یاری بهێنه كرن پێخه‌مه‌ت یاریزان د سه‌قایی هه‌ڤڕكیا دا بمینت و هه‌روه‌سان بارێ دارایی ل سه‌ر یانا سڤك بكه‌ت كو د حه‌فتیه‌كێ دا هه‌تا چار یاریا ل دووڤ ئێك بهێنه ئه‌نجامدان ئه‌وا دێ شێوێ دو قۆناغ بیت دێ چار یانه ده‌ربازبنه چارگۆشا زێرین.
ژلایێ خوه‌ڤه جوتیار عه‌لی هاریكارێ راهێنه‌رێ زاخۆ گۆت: تیما مه ب هه‌موو لایه‌ناڤه به‌رهه‌ڤه و دو یاریزانێن پیشه‌كار ژی هاتینه دناڤ رێزێن تیمێ ل كه‌ل كۆمه‌كا یاریزانێن خه‌لكێ زاخۆ، سه‌رباری یاریا ئێكێ ل گه‌ل كاره‌پا یا بزه‌حمه‌ته و تاقیكرنا ئێكێ یه لێ مه جه‌ماوه‌رێ باش هه‌یه و پشته‌ڤانێن یانا خوه نه دێ بنه ئه‌گه‌رێن سه‌ركه‌فتنێ.
