ئاریشا هنارتنا بهرههمێ چاندنێ بۆ دهڤهرێن ئیراقێ هاته چارهسهركرن
ههولێر، قائید میرۆ:
پهیڤدارێ وهزارهتا چاندنێ ئاشكرا كر، وهزارهت پشتهڤانیا وان جۆتیاران دكهت یێن بخوازن بهرههمێ خوه ببنه دهڤهرێن ناڤهڕاست و باشوورێ ئیراقێ، نوكه دشێت ببهت و دبێژیت: ههر بهرههمهكێ نڤیسار د گهل دا بیت رێگری لێ ناهێته كرن.
حسێن حهمه كهریم، پهیڤدارێ وهزارهتا چاندنێ بۆ رۆژناما ئهڤرۆ دیار كر، وهزارهتا چاندنێ ههموو بزاڤهكێ دكهت بۆ دووماهی ئینان ب ئاریشا هنارتنا بهرههمێ جۆتیارێن ههرێما كوردستانێ بۆ دهڤهرێن ناڤهڕاست و باشوورێ ئیراقێ و گۆت: “د دهمێ نوكه دا ههردو وهزارهت وهسا رێككهفتینه ههر بهرههمهكێ ل ههرێما كوردستانێ بچیته دهڤهرێن بن دهستههلاتا بهغدا، ژ لایێ وهزارهتا چاندنا ههرێمێ ڤه نڤیسار بۆ دهێته كرن، ههتا ل بازگههێن د ناڤبهرا ههردو لایان دا ئاریشه و ئاستهنگ بۆ نههێنه پهیداكرن”.
حسێن حهمه كهریم خویا كر، ئهو بهرههمێن ناڤخوهیا ههرێما كوردستانێ بن رێگری لێ ناهێته كرن، بهلێ بهرههمێن بیانی ئهگهر ب رێیا ههرێمێ بچن ئاستهنگ بۆ دهێنه دروستكرن و گۆت: “ئهم جۆتیارێن خوه ئاگههدار دكهین ئهگهر بخوازن بهرههمێن چاندنێ یان ژی تهرش و تهوالی ببنه دهڤهرێن دی یێن ئیراقێ وهزارهت دێ پشتهڤانیا وان كهت”.
