دو حه‌فتی ماینه مفاداربوونا وه‌لاتیان بۆ گرێدانا پیڤه‌رێن ئاڤێ
هه‌ولێر، قائید میرۆ:
رێڤه‌به‌رێ گشتیێ ئاڤێ ئاشكرا كر، دو حه‌فتی وه‌ك ده‌لیڤه ماینه هه‌مبه‌ری وه‌لاتیان بۆ گرێدانا پیڤه‌رێن ئاڤێ و دبێژیت: هه‌ر كه‌سه‌كێ سه‌ره‌دانا فه‌رمانگه‌هێن ئاڤێ بكه‌ت سزایێ گرێ نه‌دانا پیڤه‌رێن ئاڤێ ب رێژه‌یه‌كا به‌رچاڤ دێ بۆ هێته كێمكرن.
ئاری ئه‌حمه‌د، رێڤه‌به‌رێ گشتیێ ئاڤا هه‌رێما كوردستانێ بۆ رۆژناما ئه‌ڤرۆ دیار كر، نێزیكی دو حه‌فتیان وه‌ك ده‌لیڤه ل هه‌مبه‌ری وان وه‌لاتیان ماینه یێن هه‌تا نوكه پیڤه‌رێ ئاڤێ گرێ نه‌دای و گۆت: “ئه‌م داخوازێ ژ وه‌لاتیان دكه‌ین پێگیریێ ب بڕیارا حوكمه‌تێ بكه‌ن و سه‌ره‌دانا فه‌رمانگه‌هێن ئاڤێ بكه‌ن بۆ گرێدانا پیڤه‌رێ ئاڤێ، چونكی وه‌لاتیێن ناڤا سه‌نته‌رێ باژێڕان ل جهێ 80 هزار دیناران بۆ هه‌ر هه‌یڤه‌كێ وه‌كی سزا ب تنێ 20 هزار دینار دێ ژێ هێنه وه‌رگرتن و بۆ ده‌رڤه‌ی باژێڕێ ژی ب تنێ هه‌یڤێ 10 هزار دینارن”.
ئاری ئه‌حمه‌د گۆتژی: “بڕیارا ئازاكرنا وه‌لاتیان ژ قه‌ڕێ هه‌یڤێن بۆری ب رێژه‌یه‌كا زۆر كاریگه‌ری ل سه‌ر چوونا وه‌لاتیان هه‌بوویه بۆ فه‌رمانگه‌هێن ئاڤێ، چونكی هێشتا هژماره‌كا زۆرا وه‌لاتیان پیڤه‌رێن ئاڤێ گرێ نه‌داینه و بڕیارا حوكمه‌تێ ده‌لیڤه‌یه ئه‌و كه‌سێن هه‌تا نوكه پیڤه‌ر نه‌بوویه سه‌ره‌دانا فه‌رمانگه‌هێن حوكمه‌تێ بكه‌ن و دێ ژ بڕیارا حوكمه‌تا هه‌رێما كوردستانێ بۆ گرێدانا پیڤه‌رێن ئاڤێ مفادار بن، به‌روڤاژی پشتی ب دووماهی هاتنا ژڤانێ ئازاكرنێ وه‌لاتی نه‌شێن مفادار بن و پاره‌یه‌كێ زۆر دێ ژێ هێته وه‌رگرتن”.
