تله‌ڤزيوونا وار نەشیا خەونێن کۆما وژدان بزڤرینتە ڤە
ئەڤرۆ، ھەرھین محەمەد
ماوەکی دانوستاند دناڤبەرا کۆما (وژدان) یا درامایێ و کەنالێ(وار) دەسپێکرن، ھوسا ھاتە دیارکرن کو دێ دەست ب وەرزەکێ نوو یێ ھونەری یێ درامایێ ھێتەکرن، زارڤەکەرەکێ کۆمێ ل گەل دەرھێنەری ھۆکارێن راوستیانا ئەوان دەنگان دیار دکەن.
زارڤەکەر عەبدولسەلام سلێمان، گۆت: دەمێ کەنالێ (وار) ھنارتی یە دووڤ مەرا، دەرھێنەر(موافق روشدی) و ھەموو ئەندامێن کۆما وژدان ئامادەببوون، بتنێ زارڤەکەر (مەھدی سالح) نە ئامادەببو، مە حەز دکر کۆما وژدان ھەموو پێکڤە کاربکەن، چونکو بەرنیاس بووینە دناڤ خەلکی دا، ل دەستپێکا تەلەفزیۆنا خەبات ھەموو ئەندامێن کۆما وژدان پێکڤە کارکریە .
زارڤەکەرێ کۆما وژدان، ھێشتا ژی گۆت: کەنالێ (وار) دو سێ کومبوون ل گەل مەکرن، گۆتن درازینە دی پێکڤە کارکەین، بتنێ مایە گرێ بەست ل دادگەھێ بھێتە ئیمزاکرن، پاشان کەنالێ (وار) گۆت ئەو کوژمێَ وە داخازکری گەلەکە ئەم حەزدکەین ھوون ھاریکاریا مەبکەن، مە پیچەک ژ وی کوژمێ پاران ئینا خواری، کەنالی خوەشحالیا خوە دیارکر بڤێ چەندێ و گۆت دێ پێکڤە کارکەین.
عەبدوسەلامێ زارڤەکەر گۆت: رۆژنامەڤان (ئەحمەد یاسین) گۆتە مە ھەتا (٣٠) خەلەکێن وژدان ل بەردەستن وگرێدای جڤاکی و سیاسی وکومێدی نە، مە بەرھەڤیێن خوەکرن، ھەر دەمەکێ بێژنە مە، دئامادەینە و مە ژی گەلەک حەزدکر کارکەین ، د دووڤ دا کەنالێ (وار) گۆتە مە نوکە راوەستن ژلایێ ئابووری ڤە، نەدباشین وھەتا نوکە چ بەرسڤ نەداینە مە، مەژی چ پێنگاڤ نەھاڤێتینە .
دەرھێنەر موفەق روشدی، چیرۆکا خوە و کەنالێ (وار) گۆت: پێشنیازا بەردەوام بوون ژ کەنالی (وار) ھات، کەنالی خوە بێ دەنگ کریە، ونزانین ئەگەر چنە، ھەتا نوکە بەرسڤ نەدایە، خال و مەرج بۆ ھاتینەدیارکرن.
موفەق روشدی گۆت: ھەتا نوکە چ بەرسڤ نەداینە، دبەرھەڤین ومە گەلەک ھزرو نڤیسین ھەنە، روشدی رەخنەگرتن، گۆتژی: بۆچی ھندەک کەنالێن مە پارەکێ مەزن دمەزێخن بۆ ھندەک کارمەندان ب تایبەتی یێن بیانی، دەما دبیتە گەرا شەڤبێریەکێ یان زنجیرەکا زارڤەکرن یا خوەمالی، یان بەرنامەکێ زارڤەکرنێ یێ رەخنەیی یێ کو خەلکێ مە نوکە گەلەک پێدڤی پێ ھەی، کەنال پشتا خوە د دەنە کارێن وەسا، ل دووماھیێ دەرھێنەر (موفەق رۆشدی) گۆت: نوکە مە زنجیرەکا (٣٠)خەلەکی ھەیە و گەلەک زارڤەکرن ل بەردەستن و ھەر کەنالەکێ ب خازیت وبشێت ب بەرھەم بینت، دشێین بۆ کاربکەن .
