به‌رپرسا ئه‌نجومه‌نێ ئافره‌تێن ئامێدیێ:گه‌له‌ك ژن ب رێیا ئه‌نجومه‌نێ ئافره‌تێن ئامێدیێ بووینه خودان كار
ئامێدیێ، مه‌حمود نهێلی:
به‌رپرسا ئه‌نجومه‌نێ ئافره‌تێن ئامێدیێ بو رۆژناما ئه‌ڤرۆ دیار كر كو ئه‌و شیاینه د ماوێ بوری دا چه‌ندین خۆلێن جودا جودا ڤه‌كه‌ن و گۆت: ب رێیا ڤان خۆلان هژماره‌كا زۆر یا كچ و ژنان شیاینه ببنه خودان كار و نوكه هه‌ر ئێك ل سه‌ر كاره‌كێ یه و دشێن داهاته‌كی بو خوه و خێزانا خوه دابین بكه‌ن.
ئاخچین جبرائیل به‌رپرسا ئه‌نجومه‌نێ ئافره‌تێن ئامێدیێ دا زانین كو ئه‌وا د شیانێن وان دا بیت دێ بو ژنێن ده‌ڤه‌رێ ئه‌نجام ده‌ن و گۆت: (چونكی خه‌لكێ ده‌ڤه‌را مه گه‌له‌ك قوربانی داینه و پتریا وان ل سه‌ر جهـ و وارێن خوه نینن ژبه‌ر هندێ بێ كاری ل ده‌ڤه‌رێ زۆره، ب تایبه‌تی ژی دناڤ ئافره‌تان دا بێ كاری زۆره، چونكی ئافره‌ت نه‌شێت هه‌موو كاران بكه‌ت و ئه‌و كارێ زه‌لام دكه‌ت چێدبیت ئافره‌ت نه‌شێت وی كاری ئه‌نجام بده‌ت، ژبه‌ر هندێ دیتنا ده‌لێڤین كاری بو ژنێن ده‌ڤه‌رێ ئێك ژ ئه‌ركێن مه‌یه و پێدڤیه ب رژدی ل سه‌ر ڤێ یه‌كی راوه‌ستین).
ئاخچینێ گۆتژی: (ئه‌ڤ جوره خوله مه ڤه‌كرینه خۆلێن فێر كرنا دروارێ و شریناهیان، هه‌روه‌سا خۆلێن جوانكاریێ و چه‌ندین خۆلێن دیتر… كو دڤان خۆلان دا چه‌ندین ژنان پشكداری كریه و به‌هرا پتر ژ وان بووینه خودان كار).
ئاخچینێ د به‌رده‌وامیا ئاخفتنێن خوه‌دا دیار كر كو نوكه ژی ئه‌و یێن بزاڤا دكه‌ن ب رێیا ده‌زگه‌ه و رێكخراوێن خێرخوازی پتر خولێن فێركرنێ بهێنه ڤه‌كرن داكو ئافره‌تا ده‌ڤه‌رێ زێده‌تر بهێته دناڤ كاری دا و ببیته خودان كار و بشێت داهاته‌كێ بو خوه و خێزانێن خوه دابین بكه‌ن .
به‌رپرسا ئه‌نجومه‌نێ ئافره‌تێن ئامێدیێ ئاخچین جبرائیل ئه‌و چه‌نده ژی ئاشكرا كر، ئه‌و ئافره‌تێن خۆلێن وان تمام كری هنده‌ك ژ وانا نوكه یێ خێزانه‌كی ب رێڤه دبه‌ن و چێدبیت وێ خێزانێ بتنێ ئه‌و داهات هه‌بیت یێ ئه‌و ئافره‌ت ب ده‌ستخوه دئینت ب رێیا كارێ جوانكاریێ یان دروارێ یان ژی چێكرنا شریناهیان و كارێن دیتر یێن گرێدایی ئافره‌تان ڤه و گۆت: (حه‌تا مه ئافره‌ت هه‌یه كارێ چاندنێ یان ژی بازارگه‌ریێ دكه‌ت كو ئه‌ڤه ژی جهێ سه‌ربلندیێ یه، هه‌م بو وێ ئافره‌تێ هه‌م ژی بو خێزان و كه‌س و كارێن وێ، چونكی ڤێ ئافره‌تێ خوه نه‌هێلایه ب ژڤانا كه‌سێ ڤه بو دابینكرنا پاریێ ژیانا خوه).
