گەهشتینە چارگۆشەیا زێڕین لێ شەڕێ مەزن یێ مای
ئەڤرۆ
بۆ جارا ئێكێ د دیرۆكا خوە دا تیما باسكێت بۆلا یانەیا زاخۆ دەربازبوو قۆناغا چارگۆشەیا زێرین ژ هەڤڕكیێن خولا پلا نایابا ئیراقێ، پشتی د یاریا خوە یا گەڕا 22ێ و بەری دووماهیێ دا ب سەركەفتی ل سەر مێڤانا خوە یانەیا دیجلە ب 45 – 41 خالان، د یاریا واندا ئەوا ل ئەینیا بۆری هۆلا گرتیا بنگەهێ لاوان ل زاخۆ مێڤانداریا وێ كری.
تیما زاخۆ دەربازبوونا خوە بۆ چارگۆشا زێرین مسۆگەر كر بەری ب دووماهی هاتنا خولێ ب ئێك یاری پشتی شیایی 16 سەركەفتنان بەرانبەر شەش خوسارەتیان بینت ب 38 خالان رێزا چارێ بهێت ب هەڤپشكی دگەل یانەیێن نەفت، شورتە و حەشدا شەعبی پلێتا دەربازبوونێ وەربگرن، ئەوا بڕیارە هەڤڕكیێن وێ ل دەستپێكا هەیڤا بهێت ب شێوەیێ خول دو قۆناغ بهێنە كرن.
ل دۆر ڤێ دەستكەفتێ و بەرهەڤیێن وان بۆ قۆناغا بهێت جوتیار عەلی هاریكارێ راهێنەرێ زاخۆ بۆ رۆژناما ئەڤرۆ گۆت: پێخوەشحالین ئەو ئارمانجا دەستپێكا خولێ مە دانایی ئەم گەهشتینێ، سەرباری هێزا یاریێن خولێ، لێ ب پشتەڤانیا كارگێریا یانەیێ و ئیدارا سەربەخوەیا زاخۆ دیسان رۆلێ هەرە مەزن یێ پشتەڤانێن یانێ كو یاریزانێن شەشێ بوون د ناڤ یاریگەهێ دا، ئارمانجا مەزنتر مایە و ئەم لڤێرە نا راوەستیێن، مە شەڕێ مەزن دەستپێ نەكریە، دڤێت باشتر خوە بەرهەڤبكەین.
هەروەسان ناڤهاتی گۆت: دووماهی یاریا مە یا خولێ دگەل یانەیا نەفت ل باژێرێ بەغدایە، گرنگیا سەركەفتنێ دێ رێكخوەشكەربیت بۆ چارگۆشەیا زێرین ژبەركو ئەو یانەیێن دەربازبووینە ڤێ قۆناغێ دێ ئەنجامێن بەرانبەر ئێك د خولێ دا بوو هێنە هژمارتن، لەوما دڤێت یاریا بهێت سەركەفتنێ بینن.
