جوتیار عەلی: سەركەفتنا ئەڤرۆ دێ مفایی ل چارگۆشەیا زێرین گەهینتە مە
ئەڤرۆ
بڕیارە ئەڤرۆ تیما باسكێت بۆلا یانەیا زاخۆ یاریا خوە یا 23ێ و دووماهیێ ژ قۆناغا خولا پلا نایابا ئیراقێ ل باژێرێ بەغدا ئەنجامبدەت دەمێ دبیتە مێڤانا یانەیا نەفت دەمژمێر10شەڤ ل هۆلا شەعب.
زاخۆ دەربازبوونا خوە بۆ چارگۆشەیا زێرین مسۆگەر بوو بەری ڤێ یاریێ پشتی 16 سەركەفتن بەرانبەر شەش خوسارەتی تۆماركرین ل رێزا چارێ دهێت ب38 خالان دگەل یانەیێن نەفت، شورتە و حەشدا شەعبی دەربازبوویە كو دبیتە جارا ئێكێ د دیرۆكا خوە دا تیما زاخۆ بگەهیتە ڤێ قۆناغێ.
ل دۆر یاریا ئەڤرۆ و دووماهی بەرهەڤیان جوتیار عەلی هاریكارێ راهێنەرێ زاخۆ بۆ رۆژناما ئەڤرۆ گۆت: چارگۆشەیا زێرین ئێك ژ ئارمانجێن مە یێن دەستپێكا وەرزێ ئەڤ سالە بوو، ئەڤە ژی ب رژدیا یاریزانان و پشتەڤانیا كارگێریا یانێ و ئیدارا سەربەخوەیا زاخۆ، یا ژ هەموویا گرنگتر ئەو پشتەڤانیا جەماوەری كو د هەموو یاریان دا بەرهەڤبوون تایبەت ل باژیرێ مە و ئەڤرۆ ژی دێ ل بەغدا بەرهەڤبن بۆ پشتەڤانیێ ئەڤەژی دەستكەفتەكێ مەزنە لەوما ئەم هەتا ڤێرە ژی نا راوەستیێن و دێ شەڕی بۆ پلێن باشتر د چارگۆشەیا زێرین دا كەین.
لدۆر یاریا ئەڤرۆ ژی گۆت: یاریا دگەل نەفت گەلەك یا گرنگە و بزەحمەتە د هەمان دەم دا ژبەركو سەركەفتن دێ رێكخوەشكەربیت بۆ رێزبەندیا چارگۆشەیا زێرین، چنكو ئەو ئەنجامێن د خولێ دا دناڤ بەرا یانەیێن دەربازبووین دێ ل چارگۆشەیێ هێنە هژمارتن، لەوما یا دشیان دابیت دێ بۆ سەركەفتنێ یاریێ كەین.
