ژڤانێ هەلبژارتنێن نوونەراتیا دهۆك یا لژنا ئۆلمپی هاتە دیار كرن
ب، لاپەری:
ژێدەرەكێ باوەرپێكری ل لژنا ئۆلۆمپیا ئیراقێ ل باژێرێ بەغدا بۆ رۆژناما ئەڤرۆ دیار كر بڕیارە ل ناڤەراستا هەیڤا بهێت هەلبژارتنێن نوونەراتیا دهۆك یا لژنا ئۆلمپی بهێنە كرن، پشتی رێكار و دووڤچوونا راپۆرتا گشتی یا نوونەراتیا دهۆكێ هاتیە كرن و هەموو خال هاتینە پەسەندكرن.
ل دووڤ زانیاریێن دەست ب رۆژناما ئەڤرۆ كەفتین كو د كۆمپوونێ دا ئەو سیستەم و گوهۆڕینێن هاتینە كرن بۆ هەلبژارتنان گوهۆڕین د رێژا ئەندامان هاتیە كرن كو دێ ژ چار كەسان بۆ ئێك كەس هێنە كێمكرن ئەو ژی دێ ئەنداما كچ بیت، دیسان هەیكەلێ دەستەكا نوو بتنێ دێ ژ سەرۆكێ نوونەراتیێ و جێگرەكی بیت.
ژلایەكێ دووڤە ژێدەرێن تایبەت ل پارێزگەهێ بۆ ئەڤرۆ دیار كر سەرۆكێ نوكە یێ نوونەراتیێ وەكو ئێكانە بەربژارە بۆ پۆستێ خوە بێ هەڤڕك ژبەر شارەزاهیا وی و بوویە جهێ باوەریا هەموو ئێكەتیێن وەرزشی، دیسان بۆ جێگرێ وی دو كەسان خوە بەربژار كرینە ئەو ژی د. جەلال كەمال و مەحمود محەمەد، هەروەسان پشتی هەلبژارتنان دەستەكا نوو دێ ئەمیندارێ گشتی و سكرتێرێ نوونەراتیێ دەستنیشان كەن و دیار كر ئەو ئێكەتیێن ماف هەیی دەنگی بدەن بتنێ دێ بنە 11 دەنگدەر دگەل دا سێ ئێكەتیێن نە ئۆلمپی دێ دو ئێكەتیێن وەرزشی دەنگێ خوە دەن.
بۆ زانین ئەڤ هەلبژارتنە دێ ب سەرپەرشتیا لژنا ئۆلمپیا ئیراقێ ب هنارتنا لژنەكا تایبەت یا هەلبژارتنان بیت و دێ ب شێوەیێ فەرمی هێتە پەسەندكرن، دووڤدا دێ پێنگاڤێن باشتر هەبن ژبۆ هەماهنگیێ د چالاكیی و دانانا شایستەیەكێ هەیڤانە بۆ نوونەراتیێ ژلایێ یا ئۆلمپییا ئیراقێ ڤە بۆ چالاكیێن ئێكەتیێن وەرزشی.
