قەڕمتی
محسن عەبدلڕەحمان
باوەردارا د نڤێژا عەشقێ دا بهۆژی ژ دەوروبەران دابڕییە، دیمەنێ ئەناهیتایێ د پەرستەگەها دلداریێ ڤە، ئەنیشك چكلاندی و دەستێ ل ژێر ئەرزنكێ سەر راگرتی، تنێ د هەناسەكرنێ دا سینگێ كێل ل گەل ریتما دەنگ و لڤینا مامۆستای بلند و نزم دبیت، مژویلانك جارجار چاڤێن بەلەك د پەچنن…، وانە بەر ب داوی بوو بەری لێڤێن بیتانۆكی بلڤن، ل گەل هاتنۆچوونا مامۆستای چاڤێن ژ پەرۆشی و خەونێن سنێلەیێ پەنكیایی ب تیرەكا راست و چەپ ل گەل دزڤڕین.
(جڤاكێ پاشەڤەمای دیتنێ بەرگۆمان و بهیستنێ یەقین دكەت، گرنكیێ ب ئایردەیان ددەت و ئێكەم پەیڤ (بخوینە) پشگۆهـ دئێخیت، دەهـ ئایەت و فەرمودە دیوارێن دكانێ دخەملینن و ئێك نڤیسین نرخێ متا و كەرستەكی دیارناكەن)! د شرۆڤەكرنێ دا لڤینا دەست و لێڤان و دەنگێ پیت و پەیڤان..، پرچێ بۆزێ ماموستای ل ژێر زەرەبینا دیتنا وێ رەنگڤەدانا داخبارییە‌ك بێ ئاسۆ و توخیبە، تاكو هەڤالا وێ كێلنجییەك ل تەنشتێ دای: ( دینێ.. تا هەستێن وی دقەرمتینە ). لێ زڤڕی و دەست دا بەردەڤێ خۆ و زاڕۆیانە ئەزمانێ خۆ لێ درێژكر.
– كچێ خۆلیسەر ژ رەحمەتیێ باپیرێ تە مەزنترە! و دەرگەهێ پۆلێ ڤەبوو دا قورمێ كەزوانێ یا ب حیجابەك رەشا كەنداڤی و مستەكا سۆراڤ و سپیاڤێ داپۆشی ب ژوركەڤیت، بەرچاڤكا ب ستوونا دفنێ دا شووربووی هلدا، ب دفنبلندیا رێڤینگا ل هنگۆرێ ژییێ قەرمتی و شەمەندەفرا عەشقێ ل راوەستگەها چاڤەڕێبوونێ ژ بەدبەختی ژبیركری: (گەلی كچان سوبەهی هەشتی سپێدێ بێی زێر و موبایل…).
خویندكارەكێ ژ دەڤی ڤەگرت: ست .. ما دێ چینە كیدەرێ؟
– چ .. چینە كیدەرێ جانا من.. ها.. چینە كیدەرێ، دا رەڤدێن شلاتیا بەری مە بچن، مانە!؟ تە وەسا دڤێت؟ جهـ نهێنییە و تا مامۆستا ژی نزانن. گۆتنا رێڤەبەرێ ب توڕبوونڤە نەعیمێن كچان نە وەكو عەورێن بهارێ بەلكو وەك هێلێن خارۆڤیچێن و كەندوكۆرێن سالان ل دێمێ رێڤەبەرێ نەخشاندین؛ تێكبرن.
– ما تە شولە ژێ یە، باپیرو ب خۆ سەر كاروانە! گۆتێ و ئاماژەكرە مامۆستایێ بێدەنگ راوەساتیایی و چاڤەرێ دا رێڤەبەرا كەفان پتر ژ راسپاردان دەربارەی سەیرانێ ل كچان دكەت.
– عەوافی. ب خۆشی ڤە بەرسڤ دا.
– كچێ ب خۆدێ جادا بگرن، زالگەها دانن، حوكمەت بارێ تەنگاڤیێ رابگەهینیت، هەر دێ وەك خۆ كەین.
– ل ئاقارێ بەردڕیایی وەكو پەزێ بێ شڤان قول قول یان پەلاتینكێن ل باخچەیەك ڤەكری بڕ بڕ..، كچێن كورد و سەیرانی! مێرگ كربوونە گۆلزار، تنێ چاڤێن تەوارێ ل تەڕلانی دگەڕیان، تاكو دیتی ل سەر جۆیێ دەستێن خۆ دشۆت، پارچەكا كێكێ هەلگرت و هەڤالا وێ گۆتێ: دەلیڤەیە.. ب بەهانەیا ( سلكێ خۆ بگەهینە كوتلكێ).
– مەرگێ من گۆری ببیت، پڕچ بۆز چەندێ ماقویلە!
– و هەست قەرمتی دێ ماقوولتر لێهێت ئەگەر ئاگەهـ ژ تە هەبیت؟!
ل هنداڤ خۆ چەماند: (سەیدا كەرمكە). بەرێ خۆ ژ جۆكا ناڤ مەمكێن نوو گەهای وەرگێرا، لێ نەشیا دفنا خۆ ژ ئازڕاندنا گۆلاڤا وێ بگریت، كێك ب سوپاسی ڤە ژێ وەرگرت.
ب بەهانەیا دەست شووشتنێ ل تەنیشت روونشت: سەیدا ئەڤ سالە ژی خلاس بوو، دێ ژ هەوە خەریب بین. ب شەرمینی و شێوەكی گۆت، كو بەرسڤەك هەبیت.
– بێژە دێ بەلا هەوە ژ مە ڤەبیت.
– بۆچی سەیدا ما بەس نینە ئەم ل مال بەلاینە!؟
– هوون نە بەلانە، هوون كچ ئەو رەوشا ژیانێ نە یا كرینە بەلا! و ئاماژەكرە سەیدایێ یاسینێ ل سەر جۆیێ زەندك تا ئەنیشكا و دەلنگ تا جۆكان هلداین: ئەڤە دەستنڤێژگرتنە یان نیشاندانە؟!
– سەیدا ئەز..
– چ نە بێژە، چوار سالێن زانكۆیێ دێ دەلیڤە تێرا ڤەوژارتنا رێگا ژیانێ و هەلبژاردنا هەڤڕێ و هەڤكویڤێ ژیی هەبیت. و رابوو.
پەیڤا (حەزژتەدكەم) ما قیڕییەك خەندقی د نهال و بنداڤێن سینگ و دەروونێ وێ دا دەنگڤەددەت.
هەڤالا وێ ب دلپێڤەبوون دەستێ خۆ ل سەر ملی دانا، ئەوا لێزڤڕی و گۆتیێ: (گۆت سالا دهێت هەڤكویڤێ هەر ئێكێ ژ هەوە چاڤەڕێی هەوەیە).
راست وەسا گۆت!؟ ئانكو وەكو ئیسفی نەكەتە د بیرێ دا.. شرۆڤەیا خەونا تە زانی، ب خۆدێ ئەو ژ پەنابەرێ بابێ تە و ژ ستوشكەستێ بابێ من یێ ژنەكا بچووكتر ژ بچووكترین كچا خۆ ئینای؛ مرۆڤترە! دزانیت شاسوارە لێ رۆژا ژیێ وی ل هنگۆری بەر ب ئاڤابوونە یە و تو جانیكەكا نەهەڤۆتی، و ئەوێ حەز قەرمتی نەهەڤكویڤە.
