زاخۆ چەكێ خوە بەرهەڤكریە بۆ داگیركرنا نەفتا بەغدا
چاڤەڕێ دهێتە كرن ئەڤرۆ ل دەمژمێر 5ێ ئێڤاری تیما تەپا پێی یا یانەیا زاخۆ ڤەگەڕێتە هەڤڕكیێن خولا پلا نایابا ئیراقێ پشتی راوەستیانا خولێ بۆ نێزیكی هەیڤەكێ كو بڕیارە ل یاریگەها شەعب ببیتە مێڤانا یانەیا نەفت ژ چارچووڤێ گەڕا 33ێ یا خولێ ل پایتەختێ ئیراقێ بەغدا هێتە كرن.
ئەركێ كوڕێن خابووری بۆ ڤێ یاریێ ب سانەهی نابیت بەرانبەر تیما نەفتێ ئەوا دێ بتنێ شەڕی بۆ سێ خالان و تۆلڤەكرنا یاریا بۆری یا قۆناغا ئێكێ ژ گەڕا 14ێ كەت دەمێ ل یاریگەها زاخۆ یا نێڤدەولەتی ب سێ گۆلان بەرانبەر گۆلەكێ تووشی خوسارەتیێ بوویی، تیما زاخۆ خودانا 36 خالان ژ هەشت سەركەفتن، 12 وەكهەڤی و دگەل 12 خوسارەتیا رێزا 15ێ دهێت، ب كێمتریا شەش خالان تیما بەغدایی رێزا 18ێ دهێت لەوما یاری ب سانەهی نابیت بۆ یانەیا ئیدارا سەربەخوەیا زاخۆ ژبەر كو خودانێن ئەردی چو بژاردە نینن ژبلی ب دەستڤە ئینانا سەركەفتنێ و خوە دووركرن ژ رێزبەندیا مەترسیدار یا داكەفتنێ و دێ هەمی یاریزانێن خوەكەتە د هۆشداریێ دا و شەڕەكێ مەزن كەت، پێنەڤێت قەرەبوویا یاریا بۆری جەماوەرێ وێ داخواز ژێ دكەت.
ل دۆر دووماهی بەرهەڤیێن وان رەمەزان سەدیق یاریزانێ تیما زاخۆ بۆ رۆژناما ئەڤرۆ گۆت: بەرهەڤیێن باش هاتینە كرن و هەر تشتەكێ پێدڤی بۆ تیمێ هاتیە دابینكرن، هەموو یاریزان رژدن بۆ ئێك ئارمانج ئەو ژی سەركەفتنە، تیما نەفتێ د ناڤ جەوماوەر و ئەردێ خوە دایە لەوما دبیت ئەو زێدەتر گڤاشتنێ بكەن، لێ ئەوا ل دووڤ پلانا راهێنەرێ خوە گەشبینن ب گەهینە ئارمانجا خوە.
ژلایەكێ دووڤە ل دەمژمێر نەهی شەڤ تیما یانەیا هەولێر دێ دناڤ جەماوەر و یاریگەها خوە شەهید فرانسۆ حەریری مێڤانداریا یانەیا كەرخ یا بەغدایی كەت، هەولێر خودانا رێزا حەفتێ یە ب45 خالان و شیایە د گەڕا دویێ دا ئاست و ئەنجامێن باش بینت، كەرخ 43ێ خال هەنە رێزا 11ێ دهێت، هەر ژ یاریێن ئەڤرۆ، نەجەف- شورتە، تەلەبە- نەفت ئەلبەسرا.
