پارێزگەها دهۆكێ زاخەكا ب هێز دا وەرزشا كچان
قەیس وەیس:
د داخویانیەكێ دا سەرۆكا لژنەیا فۆتسالا كچان و ئەنداما ئێكەتیا تەپا پێی یا ئیراقێ دیار كر ب دووماهی هاتنا سەركەفتیانە یا قارەمانیا كۆپا فۆتسالا ئیراقێ ل سەر ئاستێ كچان ل پارێزگەها دهۆكێ ب چەند ئەگەران ب خوەڤە دگریت و ژەمەكا ب هێز دا وەرزشا كچان و ببیتە دەرگەه بەر ب پێشڤە بچیت.
زێدەتر د. رەشا تالب گۆت: هەرچەندە مە پێشوەخت د زانی ئەڤ قارەمانیە ل پارێزگەها دهۆكێ دێ یا سەركەفتی بیت ژبەر هەبوونا خالێن ئارامیێ و ژێرخانە و باژێرەكێ جوان و گەشت و گۆزاری كو هەمی یانەیێن پشكدار ب دەرۆنەكێ ئارام یاریێن خوە بكەن، لێ هەڤكاریا پارێزگارێ دهۆكێ د. عەلی تەتەر و لایەنیێن پەیوەندیدار وەكو پۆلیسان و زانكۆیا دهۆك و نوونەراتیا دهۆك یا لژنا ئۆلمپی چەند ئەگەرێن دی ژی یێن سەركەفتنا ڤێ قارەمانیێ بوو، ئەم سۆپاسیا هەمییان دكەین كو كەمتەر خەم نەبوون و نوونەرێ ئێكەتیا ئاسیا ژی پەسنا پارێزگەها دهۆكێ كر ب مێڤانداریكرنێ.
ژلایەكێ دووڤە ناڤهاتی گۆت: یا گرنگ ئەوە روودانێن قارەمانیێ د پرانیا یاریان دا وەكو هەڤڕكیەكا بهێز د هاتە دیتن و ئەو چار یانەیێن دەربازبووینە قۆناغا چارێك دووماهیێ كۆمەكا باش یا یاریزانێن خودان شیان دیاربوون كو دێ نێزك دا بۆ پێكهاتیێ هەلبژارتیێ ئیراقێ هێنە داخوازكرن پێخەمەت قارەمانیێن داهاتی یێن دەرڤە، زوور پێخوەشحالین كۆپا ئیراقێ ل پارێزگەها دهۆكێ بوو ئەوا ژەمەكا ب هێز دا وەرزشا كچان ل ئیراقێ و كوردستانێ و دێ بیتە پالدەر ئەڤ بەر ب پێشڤە بچیت و گەشبینم بۆ داهاتەكێ نێزكتر دێ یانە و وەرزشڤانێن كچ بەر ب زێدەبوونەڤە چن.
بۆ زانین یانەیا ئافرەتێن هەولێرێ ب ناسناڤێ كۆپا ئیراقێ هاتنە خەلاتكرن پشتی ب سەركەفتین د یاریا دووماهیێ دا دگەل یانەیا جەویە ب 4-2 گۆلان، ئەوا ب پشكداریا دەه نەه، ئیراقێ و ئێكا هەرێما كوردستانێ و چو یانەیێن پارێزگەهێ د ناڤ دا نەبوون یاریێن وان ب شێوەیێ خول ئێك قۆناغ ل سەر دو كۆمان هاتبوونە بەلاڤكرن، كۆما ئێكێ، ئافرەتێن هەولێر، تلسقۆف، جەویە، رافیدەین و بیلادی، كۆما دویێ، زەورا، قەرەقۆش، سیناعات كارەبا، ئال بدێر و شەهربان، یاریێن وان هەر ژ 19ێ هەتا 26ێ خزیرانا بۆری ل هۆلا گرتیا كولیژا پەروەردەیا چەستەتی و زانستێن وەرزشی ل زانكویا دهۆك هاتیە كرن.
