ب پشتەڤانییا سەرۆكێ حوكمەتا هەرێمێ یاریگەها یانەیا ئاكرێ دێ هێتە نووژەنكرن
د داخویانیەكێ دا سەرۆكێ یانەیا ئاكرێ یا وەرزشی بۆ رۆژنامەیا ئەڤرۆ دیار كر ب پشتەڤانی و فەرمانا مەسرۆر بارزانی سەرۆكێ حوكمەتا هەرێما كوردستانێ بڕیار هاتیە دان ب نووژەنكرنا یاریگەها یانەیا ئاكرێ ژبۆ خوە بەرهەڤكرن بۆ وەرزێ نوو یێ خولا پلا نایابا كوردستانێ.
زێدەتر سەلاح ئیبراهیم گۆت: ب سۆپاسی ڤە ب پشتەڤانی و فەرمانا سەرۆكێ حوكمەتا هەرێمێ دێ یاریگەها مە یا مەزن دۆبارە هێتە نووژەنكرن ژ فریزەیێ سادە بۆ یێ تارتانی و دیسان وەكو دیاری ژلایێ بەرێز مەسرۆر بارزانی دێ پاسەكا تایبەت یا گەهاندنا یاریزانان بۆ دەڤەرێن كوردستانێ بۆ یانەیا ئاكرێ هێتە دان، هەروەسان پشتەڤانییا خوە یا دارایی ژی بۆ یانەیێ دیار كرییە.
ل دۆر بەرهەڤیێن وان بۆ وەرزێ نوو ناڤهاتی گۆت: د دووماهی كۆمبوونا خوە یا كارگێری دا چەندین بابەت هاتنە گەنگەشەكرن و بڕیار هاتییە دان بۆ وەرزێ بهێت یێ خولا پلا نایابا كوردستانێ یا تەپا پێی نە بتنێ تیما مە وەكو هژمارە پشكداریێ بكەت بەلكو دێ هەڤڕكیێ بۆ رێزبەندیێن پێشیێ ژی كەین، لەوما بۆ ڤێ یەكێ مە پلانەك دانایە وەكو هیڤی و ئۆمێد كو ب راهێنەرەكێ خودان شیان و سەربۆر و ئینانا كۆمەكا باش یا یاریزانێن شارەزا ژ پێنچ هەتا حەفت یاریزانان كو د خولێ دا ببینە هژمارەكا بزەحمەت و هەڤڕك د خولێ دا تایبەت یاریزانێ گۆلكەر كو ئەو ل وەرزێ بۆری ئاریشەیا مە بوو، یاریزانێن مە هەتا گۆلا هەڤڕك ژی د چوون لێ هێرشبەرەكێ گۆلكەر نەبوو تمامبكەت و گۆلێ بینت.
ل دووماهیێ سەلاح ئیبراهیم گۆت: بۆ وەرزێ نوو یا د شیان دا بیت دێ كار كەین پێخەمەت ڤەگەڕاندنا هێزا یانەیا ئاكرێ د وەرزشێ دا و بزاڤێ كەین وەرزێ بهێت دلێ جەماوەرێ خوە و خەلكێ ئاكرێ ب سەركەفتن و دەستكەفتان خوەشبكەین.
