زاخۆ دێ گوهۆڕینێن مەزن د ناڤ تیما خوە دا كەت
پشتی ب دووماهی هاتنا وەرزێ 2022-2023ێ یا خولا پلا نایابا ئیراقێ یا تەپا پێی، تیما یانەیا زاخۆ ئەوا د ئاستەكێ نە خوەجهـ دا ل رێزا 14ێ هات ب كۆمكرنا 44 خالان و مانا خوە بۆ وەرزێ نوو یێ خولا پیشەكاران پاراست كو ل جهێ خولا نایاب دێ هێتە دانان، بۆ ئەڤی وەرزی پشتی سەرپەرشتێ ئیدارا سەربەخوەیا زاخۆ گۆهدار شێخۆی كلۆپا كەسك یا پشتەڤانیا دارایی بۆ یانەیێ هەلكری، دەنگۆباسێن نێزیك ژ یانەیێ دیار دكەت بۆ وەرزێ نوو دێ گوهۆڕینین مەزن د ناڤ تیمێ دا پەیدا بن.
ل دووڤ ژێدەرێن تایبەت بۆ رۆژنامەیا ئەڤرۆ دیار كر كارگێریا یانەیێ بڕیار دایە ژبلی حەفت یاریزانان دەست بەردای هەموو یاریزانان دی بیت ژ وانا پیشەكارێن تیمێ، بۆ وەرزێ نوو تیمەكا دی یا رێكخستی و ب هێزتر بهێتە پێكئینان و ئەڤە ماوەیەكە دووڤچوون و پەیوەندی ب چەند یاریزانێن دەستنیشانكری د هێنە كرن ژ وانا دێ شەش یاریزانێن پیشەكار ل سەر تیمێ زێدە كەن.
هەمان ژێدەری ئەو چەندە ژی دیار كر ژبەر داخوازیا مووچەكێ مەزن گرێبەست دگەل راهێنەرێ تیمێ یێ سوری نزار مەحرۆس و كادرێ نە هاتە نووكرن و گۆت: ئاریشە راهێنەری كۆژمەكێ مەزن یێ مووچەیێ هەیڤانە دگەل چەند پێدڤییان كو بۆ وی ل بەر دەست بیت، ئەڤ داخوازییە ژی ژ شیانێن داراییا كارگێریێ و پلانا هاتیە دانان زێدەترە، لەوما گرێبەست نە هاتە نووكرن و دیاركر هەردو راهێنەر ئەحمەد سەلاح و لوئەیی سەلاح بەربژێرن بۆ پۆستێ راهێنەراتیێ و دێ دانۆستاندن هێتە كرن ژبۆ رازیكرنا ئێك ژوان راهێنەران.
