پایسكلڤانێن یانەیا دهۆك دێ بزاڤێن پاراستنا ناسناڤێ خوە یێ ئیراقێ كەن
فیدراسیۆنا پایسكلڤانێن ئیراقێ ژڤانێ قۆناغا سێیێ یا قارەمانییا گشت یانەیێن ل سەر ئاستێ ئیراقێ بۆ كوڕان و كچان دیار كر و پارێزگەها دهۆكێ دەستنیشانكرن بۆ مێڤانداریێ، تیما پارێزگەهێ ل سەر ئاستێ تازەپێگەهشتییان پشكدارە و رژدە ژبۆ پاراستنا ناسناڤێ خوە.
د داخویانیەكێ دا د. مەعەن غەریب سەرۆكێ لژنەیا بەریكانەیان دیار كر ل 13ێ مەها بهێت پارێزگەها دهۆكێ دێ مێڤاندارییا قۆناغا سێیێ و بەری دووماهیێ ژ هەڤڕكیێن قارەمانیا ئیراقێ بۆ ئاستێن پێشكەفتی، لاوان و تازەپێگەهشتییان یێن كوڕان و ئاستێ كچان ژی ل سەر ڕێیا سەرەكی زاویتە ، كۆرا هەتا مانگێشكێ بۆ بەریكانەیێن 20 كگم، 40كگم، 50كگم، 60كگم و 140 كگم كەت، ئەوا دێ زێدەتر 220 یاریزان ژ 28 یانەیێن ئیراقێ و كوردستانێ پشكداربن.
ل دۆر بەرهەڤیێن تیما دهۆكێ تارق سەعید بۆ رۆژنامەیا ئەڤرۆ گۆت: پشتی د هەردو قۆناغێن ئێكێ و دویێ ب سەرفەرازی تیما مە شیایی رێزا ئێكێ ل سەر ئاستێ گشتی یێ خالێن یاریزانان ب دەستڤە بینت كو گەهشتییە 525 خال، بۆ قۆناغا سێیێ و دهێتە هژمارتن ڤەبڕ بەرهەڤیێن باش دهێنە كرن و هەمی یاریزانێن مە ل دووڤ پلان و بەرنامەیێ رۆژانە راهێنانێ پێگیریێ دكەن و ئەو یاریزانێن مە ئەوێن دێ بۆ قۆناغا سێیێ ژی بەردەوامیێ دەنە هەڤڕكییان ئەو ژی ئاریوس سلێمان، محەمەد سادق نوری، یوسف جیهاد، یوسف عەرفان و ئیبراهیم سەمیر و من باوەرییەكا باش ب هەمی یاریزانان هەیە كو دێ شێن دەستكەفتەكێ دی بۆ پارێزگەها خوە ئینن، یا نوكە ئەم سەر كار دكەین مفایی ژ بەریكانێ وەربگرین ژبەركو ئەم دێ مێڤانداریێ كەن و ئەو رێكا هاتییە دەستنیشانكرن پلانێن باش داناینە كو بهێتە ژبەركرن بۆ چاوانییا بەریكانێ.
