باسكێت بۆلا سەنحاریب گرێبەستا پیشەكارەكا ئیرانی ئیمزا كر
د داخویانیەكێ دا سەرۆكێ یانەیا سەنحاریب یا وەرزشی دیار كر ب فەرمی گرێبەست دگەل یاریزانەكا پیشەكارا وەلاتێ ئیرانی ئیمزا كر خوە بەرهەڤكرنا تیما وان یا باسكێت بۆلێ ل سەر ئاستێ كچان بۆ وەرزێ نوو یێ خولا پلا نایابا ئیراقێ و قارەمانییا عەرەبی.
زێدەتر داود رەبەن بۆ رۆژنامەیا ئەڤرۆ گۆت: پێخەمەت ب هێزكرنا رێزێن تیما مە یا باسكێت بۆلێ و باشترین بەرهەڤی بۆ دو قارەمانیێن جودا، ب فەرمی گەهشتینە رێكەفتنێ و گرێبەست دگەل یاریزانا پیشەكار یا ئیرانی زەهرا حەق جۆ ئەوا بەری نوكە یاریزانا هەلبژارتیا ئیراقێ بوویە وەكو پێنگاڤا ئێكێ بۆ پشكداریەكا ب هێز بۆ وەرزێ نوو یا قارەمانییا خولا ئیراقێ بۆ پێشكەفتیان ئەوا بڕیارە هەڤڕكیێن وێ ب شێوەیێ كۆمڤەبوون هەر ژ ئێكێ هەتا هەشتێ تەباخا بهێت هەولێرا پایتەخت مێڤانداریا وێ بكەت و مەرەما مە پاراستنا ناسناڤێ خوە كەین.
هەروەسان ناڤهاتی گۆت: پشتی ل وەرزێ بۆری تیما مە یا باسكێت بۆلێ ناسناڤێ قارەمانیا ئیراقێ ب دەستڤە ئینایی، وەكو نوونەرا ئێكانە دێ پشكداریێ د قارەمانیا عەرەبی دا كەین ئەوا بڕیارە هەڤڕكیێن وێ ل شەشی ئەیلۆنا بهێت وەلاتێ مەغرب مێڤانداریا وێ بكەت، كرێبەستا یاریزانا ناڤهاتی ل سەر پێدڤییا تیمێ و سیستەمێ قارەمانیێ هاتیە، دیسان ژبەر كو ئەڤ قارەمانیە دێ ب پشكدارییا پرانییا یانەیێن قارەمانێن وەلاتێن عەرەبی بیت و یا فەرمییە ل سەر ئاستێ پۆلیككرنێ ژلایێ فێدراسیۆنێن ئاسیا و عەرەبی ڤە هاتیە كرن.
سەرۆكێ یانەیا سەنحاریب ئەوچەندە ژی دیار كر تیما وان وەكو نوونەرا ئیراقێ و ب شانازی ڤە یا كوردستانێ و پارێزگەهێ ئێكانەیە دێ پشكداریێ كەن و گۆت: نە بتنێ بۆ هژمارە بین بەلكو دێ بزاڤێن مەزن كەین هەڤڕكیێ ل سەر رێزبەندیێن ئێكێ و ناسناڤی بكەین، لەوما بەرهەڤیێن مە دێ ب شێوەكێ رێكخستی و پلان بن و ئەم دێ پێدڤی ب هەتا دو یاریزانێن پیشەكار بین ل دووڤ سیستەمێ قارەمانیێ، بۆ ڤێ یەكێ ژی دێ بزاڤێ كەین یا دشیان دا بیت و ئارمانج بهێتە كرن و دخوازین ژ لایەنیێن پەیوەندیدار ژ وانا پارێزگارێ دهۆك د. عەلی تەتەر پشتەڤانیا مە بكەن ئەوێ هەردەم بۆ هەر پرۆژە و پشكداریەكا ب ناڤێ پارێزگەهێ و كوردستانی كریە تایبەت وەرزشێ كرییە، دیسان نوونەراتیا دهۆك یا لژنا ئۆلمپی و ئێكەتییا باسكێت بۆلێ كو رۆلێ خوە بینن، ژبەركو ئەڤ پشكداریە یا تایبەتمەندە و ژبلی قارەمانیێن وەلاتێن عەرەبی چو یانەیێن دی نەشێن پشكداربن و ئەم تاكە یانەكا كوردستانی نە ژ پارێزگەها دهۆكێ و ئیراقێ پشكداریێ دكەین.