جارا ئێكێ یە راهێنەرەكێ قەتەری دهێتە خولا ئیراقێ
د داخویانیەكێ دا رێڤەبەرێ تیما تەپا پێی یا یانەیا زاخۆ دیار كر ب فەرمی گەهشتنە رێكەفتنێ دگەل راهێنەرێ گەنج یێ قەتەری تەلال ئەلبەلۆشی بۆ سەرپەرشتیكرنا تیمێ و خوە بەرهەڤكرن بۆ وەرزێ نوو 2023- 2024یێ خولا ئیراقێ یا پیشەكاران.
زێدەتر تاها عەبدولحەكیم گۆت: ژبۆ باشترین بەرهەڤی و دەست ب دانانا تیمەكا بهێزتر ژ وەرزێ بۆری كارگێرییا یانەیا زاخۆ ب فەرمی گەهشتە رێكەفتنێ دگەل راهێنەرێ گەنج یێ قەتەری تەلال ئەلبەلۆشی ژبۆ سەرپەرشتیكرنا تیما مە بۆ وەرزێ نوو یا خولا پیشەكاران، دووڤدا دێ لژنەیەكا تایبەت ژ وانا راهێنەرێ نوو دەست ب دووڤچوون و دانۆستاندنێ دگەل چەندین یاریزانێن ئیراقی و پیشەكاران كەن ژبۆ ئیمزاكرنا گرێبەستا یانەیێ.
هەروەسان ناڤهاتی گۆت: راهێنەرێ نوو یێ یانەیا زاخۆ سەربۆرا هەیی وەكو هاریكارێ راهێنەرێ یانەیا ئەلشیمال یا قەتەری بوو، خودان ئارمانجە و سەربۆرەكا باش یا هەیی د راهێنانێ دا وەكو یانەیا زاخۆ ژی هەردەم مفا ژ راهێنەرێن گەنج وەرگرتیە نموونە ئەحمەد سەلاح و فیراس ئەلخەتیب، لەوما ل دووڤ سیڤیێ راهێنەر تەلال ئەلبەلۆشی خالێن باش یێن سەركەفتنێ ل دەڤ هەنە و خودانێ باوەرنامەیا پرۆ یا ئاسیایی بلندترین باوەرنامەیە، مە باوەری ب شیانێن وی هەیە و ئەو ب خوە ژی دێ هێتە خولا ئیراقێ پێخەمەت دیاركرنا ئەوان شیانان و گەشبینن بۆ وەرزێ بهێت دێ زاخۆ باشترین شێوە و هەڤڕك هێتە دناڤ خولێ دا.
بۆ زانین تەلال ئەلبەلۆشی یاریزانێ بەرێ یێ یانەیا ئەلسەد و هەلبژارتیێ قەتەری بوو، دایكبوویێ 1986یە رەكەز كوێتی یە، 14 ناسناڤ دگەل یانەیا خوە ب دەستڤە ئینابوون، ناسناڤێ چامپیۆنزا ئاسیا 2011ێ، لێ 2020ێ چوویە د ناڤ كارێ راهێنەریێ دا بۆ ماوەیەكێ دەستنیشانكری دگەل راهێنەرێن یانەیا ئەلشباب یا سعۆدیێ و یانەیا بەرشەلۆنا و ڤیاریال یێن ئسپانی نێزیكبوویە ژبۆ بهێزكرنا ئاستێ خوە یێ راهێنانێ، ل كانوونا ئێكێ یا سالا 2019ێ كاروانێ خوە وەكو یاریزان ب دووماهی ئینابوو.
