ئاشتی كەریم: دەلیڤەكا باش ل بەردەستێ مەیە بۆ دروستكرنا نڤشەكێ نوو بۆ فوتسالا پارێزگەهێ
راهێنەرێ نوو یێ تیما فوتسالا یانەیا ئافرەتێن دهۆكێ ل سەر ئاستێ تازەپێگەهشتییان گەشبینییا خوە دیار كر ب دروستكرنا نڤشەكێ نوو یێ یارییا فوتسالا كچان بۆ پارێزگەها دهۆكێ و پشتەڤانییا یانەیێ ب خالا سەرەكی یا سەركەفتنێ بۆ گەهشتن بەر ب ئەڤێ ئارمانجێ دا زانین و پشكدارییا تیما خوە د قارەمانییا كوردستانێ دا نە بتنێ بۆ هژمارە بەلكو هەڤڕكیێ ژی بكەن.
زێدەتر ئاشتی كەریم د دیدارەكێ دا بۆ رۆژنامەیا ئەڤرۆ: پێخوەشحالم وەكو راهێنەرێ نوو دوبارە ڤەگەڕیایمە و ئەڤچارە دێ ئەركێ مە ل دووڤ پلان و بەرنامەیێ یانەیێ جودا بیت ئەو ژی ئاڤاكرنا نڤشەكێ نوو كو ببنە شەنگستەك و باشترین دەلیڤەیە بۆ دروستكرنا یاریزانێن یارییا فوتسالێ ل پارێزگەها دهۆكێ، پێنەڤێت ئەركێ مە ب سانەهی نابیت لێ رژدییا كارگێرییا یانەیێ و پشتەڤانییا ماددی و مەعنەوی كو هەمی پێدڤی بۆ سەرخستنا ئەڤێ پلانێ دابین كرینە هەر ژ هاتن و چوونا یاریزانان كو ئێك ژ كێشەیێن مەزن یێن یاریزانێن كچ هەتا دگەهیتە پێدڤیێن تایبەت یێن تیمێ، یا گرنگ د نوكە دا مە 30 یاریزانێن هەین ژ وانا 12 یاریزانێن د ژیێن ل سەر 2007 دا ئەڤە ژی دێ بنە پاشەرۆژەكا گەش بۆ فوتسالا دهۆكێ.
ژلایەكێ دووڤە ناڤهاتی بۆ بەرهەڤیێن قارەمانییا كوردستانێ گۆت: ژبەركو مەرەما مە یا سەرەكی دروستكرنا نڤشەكێ نوو یە لەوما چو گڤاشتنێ ل سەر یاریزانێن خوە ناكەین بۆ هەڤڕكیێ ل سەر ناسناڤی چنكو مە بەرنامەكێ تەسەل هەیە ژبۆ ئاڤاكرن و بەرهەڤكرنا یاریزانێن باش ژلایێ ئاستی، هونەری و چەستەیی، لێ رامانا وێ ژی ئەو نینە گرنگیێ ب قارەمانیێ نادەین بەلكو ئارمانجا مە ژی بۆ هەر یارییەكێ سەركەفتنە و هیڤیێن ناسناڤی مە هەبن ئەڤ خالە ژی گرنگە كو یاریزانێن مە فێربنە رێكێن سەركەفتنان.
راهێنەرێ ئافرەتێن دهۆكێ گۆت: ئەڤ تیمە پێدڤی ب راهێنانێن بەردەوامن كو ل دووڤ پلانا كارگێریێ و بەرنامەیێ مە پشتی ب دووماهی هاتنا قارەمانیێ ژی ئەم نا راوەستیێن بەلكو دێ بەردەوام راهێنانێن خوە كەین پێخەمەت ب گەهینە ئارمانجا دەستنیشانكری، گەشبینم ب پشتەڤانییا كارگێرییا یانەیێ ئەوا هەر تشتەكێ پێدڤی بۆ مە بەرهەڤكری و پشتەڤانییا پارێزگارێ دهۆكێ دێ شێن نڤشەكێ نوو ژ یاریزانێن یارییا فوتسالێ بۆ پارێزگەها دهۆكێ بەرهەڤكەین.
بۆ زانین تیما فوتسالا یانەیا ئافرەتێن دهۆك نوونەرا ئێكانە یا پارێزگەها دهۆكێ د قارەمانییا كوردستانێ دا یە ئەوا بڕیارە هەڤڕكیێن وێ ل سەر ئاستێ تازەپێگەهشتییان بۆ ژدایكبوویێن 2008 و سەر دا ب پشكدارییا هەشت یانەیان هەر ژ 20هەتا25ێ ڤێ مەهێ هەولێرا پایتەخت مێڤاندارییا وێ بكەت.
