زاخۆ ئێكەم گرێبەست راگەهاند عادل سندی: وەرزێ ئەڤ سالە دێ باشتر و هێزتر ڤەگەڕین
د داخویانیەكێ دا بەرپرسێ راگەهاندنا یانەیا زاخۆ یا وەرزشی بۆ رۆژنامەیا ئەڤرۆ دیار كر دوهی ب فەرمی ئێكەم گرێبەستا یاریزانێ پیشەكار بۆ تیما خوە یا تەپا پێی راگەهاند خوە بەرهەڤكرن بۆ وەرزێ نوو یێ خولا ئیراقێ یا پیشەكاران.
زێدەتر عادل سندی گۆت: پشتی گرێبەستا راهێنەرێ قەتەری یێ گەنج تەلال ئەلبەلۆشی هاتییە ئیمزاكرن هەرزوو دەست ب دانانا لژنەیەكا تایبەت یا دووڤچوونێ و گرێبەستان دگەل یاریزانان هاتیە كرن، دوهی ب فەرمی ئێكەم گرێبەست هاتە راگەهاندن ئەو ژی یێ بەرازیلی ئینك سۆسا یاریزانێ هێلا بەرەڤانیێ یێ 23ێ سالی یە بەری نوكە یاریزانێ یانەیا ئیرزەنی یا ئەلبانی یاری كرییە، ئەم دێ بەردەوامبین ل سەر ئینانا یاریزانان ل دووڤ داخوازییا راهێنەری و هەتا نوكە چەندین یاریزانێن دی د خولا ئیراقێ و دەرڤە وەكو پیشەكار ل سەر هێلن و دانۆستاندن دگەل وان دهێنە كرن و گەشبینن د ڤێ حەفتییێ دا هژمارەكا دی یا گرێبەستێن یاریزانان هێنە راگەهاندن.
ژلایەكێ دووڤە ناڤهاتی گۆت: ل دووڤ ئەوێ پلانا كارگێریێ و ب پشتەڤانییا سەرپەرشتێ ئیدارا سەربەخوەیا زاخۆ بۆ وەرزێ نوو گەشبینن تیما یانەیا زاخۆ ب باشتر و ب هێز بهێتە دناڤ خولا ئیراقێ دا سەرباری وەرزێ بهێت دێ هەڤڕكییەكا باش هەبیت تایبەت پشتی سیستەمێ خولێ هاتیە گوهۆڕین ژ نایاب بۆ پیشەكاران و چەندین رێنما و مەرجێن نوو دێ هێنە دناڤ خولێ دا، لێ جەماوەرێ خوە پشت گەرم دكەین یانەیا زاخۆ ل دووڤ شیانێن خوە دێ باشترین شێوە تیمەكێ بەرهەڤ كەت.
