كچێن سەنحاریب رێزا سێیێ ل سەر ئاستێ ئیراقێ ب دەستڤەئینا
قەیس وەیس:
تیما كچێن یانەیا سەنحاریب ناسناڤێ وەرزێ بۆری یا قارەمانییا ئیراقێ بۆ یارییا باسكێت بۆلێ ژ دەستدا و ل رێزا سێیێ هاتن، پشتی هەشت خال ژ سێ سەركەفتن و دو خوسارەتی كۆمكرین، د هەڤڕكیێن واندا ئەوا دوهی ل هۆلا گرتییا یانەیا ئەكاد ل هەولێرا پایتەخت هاتییە كرن.
د داخویانیەكێ دا داود رەبەن سەرۆكێ یانەیا سەنحاریب بۆ رۆژنامەیا ئەڤرۆ گۆت: ئەڤ قارەمانییە بۆ مە وەكو بەرهەڤی و تاقیكرنەكا بهێز بوو ژبۆ باشترین بەرهەڤی بۆ قارەمانییا عەرەبی ئەوا بڕیارە هەڤڕكیێن وێ ل شەشێ ئەیلۆنا بهێت وەلاتێ مەغرب مێڤاندارییا وێ بكەت، لەوما مە ب تیمەكێ پشكداری كر چەند یاریزانێن گەنج، هەرچەندە هیڤیێن مە پاراستنا ناسناڤێ وەرزێ بوری بوو لێ گڤاشتنێن ل سەر تیمێ و ئاستێ لاواز یا پیشەكارا مە یا ئیرانی كارتیكرن ل سەر ئەنجامێن تیمێ كرن، یا گرنگ بۆ تیما مە هزر د قارەمانییا عەرەبی دا دكەین و د نێزیك دا دێ دو پیشەكاران ئینن لێ ئاریشەیا مە ئەم چاڤەڕێ پشتەڤانییا دارایی نە ژبۆ پشكداریێ و هەكە نە هاتە دان دێ نەچاربین پشكدار نەبین و تووشی سزایێن فیدراسیۆنا عەرەبی بین.
بۆ زانین قارەمانییا ئیراقێ ب پشكدارییا شەش یانەیان بوو ئەوژی سەنحاریب، ئەكاد، ئەفرۆدێت، غازا باكۆر، دەربەندیخان و سایبس، ئەوا یانەیا غازا باكۆر ب ناسناڤی هاتییە خەلاتكرن.
