دورستكرنا هەلبژارتیێ پارێزگەهێ ل دووڤ ئاستێ یاریزانان بوویە و ئارمانجامە سەرکرڤتنە
د دیدارەكێ دا راهێنەرێ هەلبژارتیێ پارێزگەها دهۆكێ بۆ یارییا تەپا پێی عەلی وەحیددین دیار كر پشكداریكرنا تیما وان بۆ قارەمانیا ئیراقێ ل سەر ئاستێ پارێزگەهان نە بتنێ بۆ هژمارەیە بەلكۆ دێ بزاڤێ كەن بەر ب دووماهی قۆناغ بچن و هەڤڕكیێ ل سەر رێزێن ئێكێ بكەن، ئەوا بڕیارە ل ئەینیا بهێت ئێكەم یارییا خوە ژ چارچووڤێ كۆما دەڤەرا هەرێما كوردستانێ ل دەمژمێر 4:30 دگەل هەلبژارتیێ هەولێرێ ل یاریگەها یانەیا دهۆك بكەت، ئەوا چار هەلبژارتی پشكدارن ئەوژی، دهۆك، سلێمانی، هەولێر و كەركووك، یاریێن وان ب شێوەیێ خول ئێك قۆناغ دو تیم دێ دەربازبنە قۆناغ دویێ.
زێدەتر عەلی وەحیددەین بۆ رۆژنامەیا ئەڤرۆ گۆت: پشتی ئەم هاتینە ئاگەهداركرن ب دروستكرنا هەلبژارتیێ پارێزگەها دهۆكێ بۆ قارەمانییا ئیراقێ مە خواست چو مایتكرن د هەلبژارتنا یاریزانان دا نەهێتە كرن، لەوما ل سەر ئاستێ پارێزگەهێ مە دووڤچوونا یاریزانێن هەموو یانەیان كرن و شیاین كۆمەكا باش و بێ فەرق و جوداهی ژ پرانییا باژێرێن پارێزگەها دهۆكێ بینن كو ل دووڤ ئاست و شیانێن وان، دووڤدا مە دەست ب راهێنانان كربوو پێخەمەت نێزكبوونا یاریزانان و دانانا پێكهاتییەكێ دروست ئەڤچەند ژی ئەم گەهشتینە مەرەما خوە پشتی ئەنجامدانا سێ یاریێن هەڤالینی.
هەروەسان ناڤهاتی گۆت: مەرەما مە بۆ پشكداریێ نە بتنێ وەكو هژمارەیە بەلكو دەربازبوونە بۆ قۆناغا دویێ و دووڤدا دێ پلانێن هەڤڕكیێ ژی كەین و ئەز ژ ئاستێ یاریزانان رازیمە، ب هیڤییا وێ یەكێ بشێن ل دووڤ ئارمانجا خوە ب گەهینە هیڤیێن دەستكەفتەكی.
