پشكداریا یانەیا ئاكرێ یا وەرزێ ئەڤ سالە بۆ هەڤڕكیێ یە
د داخویانیەكێ دا ئەندامێ كارگێرییا یانەیا ئاكرێ یا وەرزشی دیار كر بۆ وەرزێ نوو 2023-2024 یا خولا پلا نایابا كوردستانێ نە بتنێ بۆ پشكداریێ یە بەلكو بزاڤێن مە هەڤڕكی یە بۆ رێزێن پێشیێ و حەفتییا بهێت دێ دەست ب بەرهەڤیێن خوە كەین.
زێدەتر هۆزەڤان زاهد بۆ رۆژنامەیا ئەڤرۆ گۆت: ل دووڤ پلانا وەرزێ ئەڤ سالە یا كارگێرییا یانەیێ بۆ خولا پلا نایابا كوردستانێ، ئەم پشكدارییەكا سەرفەرزا و سەركەفتی بكەین و نە بتنێ ببینە تیمەكا هژمارە لێ بزاڤێن مە و ئارمانجا مە هەڤڕكی یە بۆ رێزێن ئێكێ و ناسناڤێ وەرزێ نوو، پێنەڤێت ئەڤ چەندە ژی هات پشتی سەرۆكێ حوكمەتا هەرێما كوردستانێ بەرێز مەسرۆر بارزانی پشتەڤانییا خوە بۆ یانەیا ئاكرێ دیار كر و بڕیاردا یاریگەها مە بهێتە نۆژەنكرن كو ئەڤ گەشبینیە ل دەڤ مە و وەرزشڤانێن باژێرێ ئاكرێ پەیدا كرییە و مە دەست ب پلان و بەرنامەیێ خوە بۆ وەرزێ نوو كر.
هەروەسان ناڤهاتی گۆت: پێنگاڤا ئێكێ بۆ پلانا هاتییە دانان گرێبەست دگەل راهێنەرێ رەكەز سوری یونس سلێمان ئێمزاكر و هاریكارێ وی كوڕێ باژێرێ ئاكرێ هەژار سابر دێ دگەل دابیت، هەروەسان راهێنەرێ گۆلپارێزان فەرید سەفا ناجی و یێ شیانێن چەستەیی د. ئەوس محەمەد ئەلحیجازی، دیسان بڕیارە بۆ حەفتییا بهێت د ناڤبەرا 15- 16ێ ڤێ مەهێ تیما مە یا تەپا پێی ئێكەم یەكا خوە یا راهێنانێ ئەنجامبدەت و دێ كەمپێ راهێنانێ یێ نافخۆ یێ هێتە دانان.
ل دووماهیێ هۆزەڤان زاهدی گۆت: د نوكە دا ئەم یێ دانۆستاندنێ دگەل دو پیشەكاران دكەین و چاڤەڕێ نە د نێزك دا بگەهینە رێكەفتنێ پشتی كادرێ راهێنانێ رازیبوونا خوە دیار كری، ئەڤچەندە ژی بۆ وێ یەكێ رێزێن تیمێ بهێز بێخیت و باشترین بەرهەڤی بهێنە كرن.
