دبیت د خولا ئیراقێ دا کار ب سیستەمێ ڤار نەهێتە کرن
سەرباری بڕیارا ب جهئینانا سیستەمێ ڤارێ بۆ وەرزێ نوو 2023-2024 یا خولا تەپا پێی یا ئیراقێ بۆ پیشەكاران و دانانا خولێن فێركرنا دادڤانان، شارەزایێن دادڤانییا وەرزشی دیار دكەن كو ب زەحمەتە وەرزێ ئەڤ سالە كار پێ بهێتە كرن.
ژێدەرێن تایبەت بۆ رۆژنامەیا ئەڤرۆ دیار كر كو وەرزێ ئەڤ سالە كارپێكرن ب سیستەمێ ڤارێ گەلەك ب زەحمەتە، ژبەركو پرانییا یاریگەهان پێدڤی ب سەخبیریێ و جهێن تایبەت یێن دانانا سیستەمێ ناڤبری یە، لەورا دهێتە پێشبینیكرن وەرزێ ئەڤ سالە یان ب ئێكچاری ڤار ب كار نەهێت یان ژی ل هندەك یاریگەهێن مۆدرێن وەكو یاریگەها شەعب، دهۆك، زاخۆ، شەهید فرانسۆ حەریری، بەسرا، كەربەلا و یاریگەها فەیحا
ل دۆر ڤێ یەكێ رەعەد سەلیم دادڤانێ پێشتر یێ نێڤدەولەتی گۆت: سیستەمێ ڤار پێدڤی ب پێنگاڤێن پراكتیكی نە و ئەگەرێ سەرەكی یێ ئینانا ڤێ سیستەمی لایەنێ داراییە ئەوژی هەكە ب دورستی بۆ هاتە مەزاختن دێ بەرهەڤبیت، دیسان پشتی ڤێ قۆناغێ دڤێت ژێرخانەییا رێكخستی دناڤ یاریگەهێن تەپا پێی دا هەبن ژبۆ كارپێكرنا وێ، دووڤدا هەبوونا دادڤانێن شارەزا كو فاكتەرێن هەبوونا ڤارێ نە، لێ ئەڤچەندە ژی پێدڤی ب شەش مەهان هەیە ژبۆ كارەكێ رێكخستی و سەركەفتی.
