هاریكارێ راهێنەرێ زاخۆ ئەگەرێ ژ دەستدانا ناسناڤێ چەلەنگیێ دیار كر
د داخویانیەكێ دا هاریكارێ راهێنەرێ تیما باسكێت بۆلا یانەیا زاخۆ ئەگەرێن ژ دەستدانا ناسناڤێ چەلەنگینێ دیار كرن پشتی بەرانبەر قارەمانا وەرزێ بۆری یانەیا نەفت یا بەغدایی ب71- 78 خالان تووشی خوسارەتیێ بوویی، د یارییا واندا ئەوا ل ئەینییا بۆری هۆلا گرتییا شەعب ل پایتەختێ ئیراقێ بەغدا هاتییە كرن.
زێدەتر جوتیار عەلی بۆ رۆژنامەیا ئەڤرۆ گۆت: سەرباری تیما مە ناسناڤەكێ نێزیكی دەستڤە ئینانێ و ب زەحمەت ژ دەستدایی، لێ وەكو ئاست و هونەرێ یێ پیشەكار و جیهانی بوو و گەلەك شرۆڤەكاران پێشبنییا خوسارەتیەكا زێدەتری 25 خالان دابوولێ، لێ بەرۆڤاژی مزگینییا تیمەكا هەڤڕك بۆ وەرزێ نوو یا خولا پلا نایابا ئیراقێ دا و گەشبینم دێ پێنگاڤ بۆ پێنگاڤ باشتر بیت و شێن ل دووڤ ئارمانجا خوە ب گەهینە ئەوان هیڤییان ئەو ژی دەربازبوون بۆ چارگۆشەیا زێرین و دووڤدا هزر ل هەڤڕكیێ بۆ ناسناڤی.
ل دۆر ئەگەرێن ژ دەستدانا ناسناڤی ناڤهاتی گۆت: تیما یانەیا زاخۆ هەڤڕكەكا بهێز بوو بەرانبەر یانەكێ كو دناڤ ئەردێ خوە دا و قارەمانا وەرزێ بۆری و دیسان یاریزانێن ئاست بلند هەیی، هەتا دووماهی چركە یاریزانان مە بەردەوامی دا گڤاشتنان و شەڕێ تۆماركرنا خالان دكر، ئەگەرێ زانستی یێ خوسارەتییا تیما مە ڤەدگەڕێتە تۆماركرنا ئەوان خالێن ژ نشكەكێ ڤە فاست برێك ئانكو هێرشێن ب لەز كو تیما نەفتێ مفا ژێ وەرگرت و شیان 28 خالان تۆماربكەت، یێن مە بتنێ سێ خال تۆماركرن ئەڤچەندە دیارك ركو یاریزانێن مە وەستیانا رێكێ كارتیكرن ل سەر جەستیا وان كر و دیسان گیرووبوونا یاریزانێن مە یێن پیشەكار بۆ ناڤ رێزێن تیمێ دا بەرۆڤاژی تیما وان یا درۆست و بەرهەڤ بوو، یا گرنگ بۆ وەرزێ نوو گەشبینی بۆ تیمەكا بهێز دا پەیداكرییە و ئەم پشتگەرمیێن جەماوەرێ خوە نە.
بۆ زانین تیما یانەیا زاخۆ ل چارشەمبییا بهێت دێ یارییا خوە یا ئێكێ ژ وەرزێ نوو یا خولا پلا نایابا ئیراقێ ل بەغدا بەرانبەر یانەیا حەشدا شەعبی كەت.
