سەلام عەلی تایكواندۆیا زاخۆ گەهاندە ئاسیا و بێ پشتەڤانییە
سەلام عەلی راهێنەرێ گەنج یێ باژێرێ زاخۆ و راهێنەرێ یارییا تایكۆاندۆیێ د ماوەیێ كارێ خوە دا وەكو راهێنەر شیاییە نڤشەكێ نوو بەرهەڤ بكەت و چەندین یاریزانێن باژێرێ خوە ل سەر ئاستێ ئیراقێ و دەرڤە پێش بێخیت و بگەهینتە قارەمانییا ئاسیا، لێ نەبوونا پشتەڤانیێ وەكرییە ئەو نڤشە بەر ب نەمانێ بچیت.
ل دۆر ڤێ یەكێ راهێنەرێ ناڤهاتی بۆ رۆژنامەیا ئەڤرۆ گۆت: ژبەركو باژێرێ زاخۆ وەرزشا تایكۆاندۆیێ ئێك ژ گرنگترین یارییانە گەنجێ زاخۆ حەز ژێ دكەت و بەهرەمەند دناڤ دا هەنە مە هەمی بزاڤ كرن بنیاتەكێ بهێز و نڤشەكێ ئەكادیمی و زانستی پەیدا بكەین، هەرزو یاریزانێن كوڕێن زاخۆ د ژییەكێ بچووك دا پشتی راهێنانێن بەردەوام ناسناڤێن نافخۆ و دەرڤە ب دەستڤە ئینان كو دبیتە جارا ئێكێ یاریزانێ زاخۆ دەستكەفتێن بڤی شێوەیی بینت نموونە هارۆن عەبدوللا و سامان محەمەدعەلی رێزێن ئێكێ د قارەمانییا كوردستانێ دا هاتبوون، چار یاریزانێن زاخۆ پشكداری قارەمانییا عەرەبی ل تۆنسێ كربوون و شیان رێزێن ئێكێ و دویێ ل سەر كێشێن خوە بهێن ئەوژی هارۆن عەبدوللا، سامان محەمەدعەلی، بۆتان رەمەزان و موئمن عەبدولسەلام و سیپان و موئمنی و فارۆز شێخ موسا رێزێن ئێكێ و دویێ و سێیێ هاتن، هەروەسان رۆژ رزگار و رەیان رەمەزان و ئەیوب محەمەد رێزێن ئێكێ و دویێ یێن قارەمانیێن كوردستانێ و دەرڤە ئیناینە، دەستكەفتێن ئەڤان یاریزانان هەتا ئەڤرۆ ژی بەردەوامن تایبەت هارۆن عەبدوللا بناڤێ هەلبژارتیێ ئیراقێ ل فیتنامێ بوو قارەمانێ ئاسیا، ل هندێ ژی بوو قارەمان و قارەمانییا عەرەبی ل مسرێ رێزا سێیێ ئینا.
ناڤهاتی ئەڤچەندە گۆت: دیاركرنا ئەڤان دەستكەفتێن گەنجێن زاخۆ بەلگەیە مە كۆمەكا مەزن یا یاریزانێن خودان شیان هەنە و ناڤێ زاخۆ ل سەر ئاستێ ئاسیا و عەرەبی بلند كریە، لێ مخابن ئەڤ یاریزانە ب كادرێ راهێنانێ بێ پشتەڤانی نە و چو هەلسەنگاندن ژی بۆ نا هێتە كرن هیڤییا مە ئەوە سەرپەرشتێ ئیدارا زاخۆ خوە ل ڤێ تیمێ بكەتە خودان.
