پایسكلڤانێن دهۆكێ ب ژڤانن پاراستنا دەستكەفتێ قۆناغا ئێكێ دوبارە بكەن
بڕیارە سوبەهی پێنچ شەمبی تیما تازەپێگەهشتیێن یانەیا دهۆك یا پایسكلان ب كەڤنە د هەڤڕكیێن قۆناغا دویێ یا قارەمانیا كوردستانێ دا ئەوا دێ هەڤڕكیێن وێ ل هەولێرا پایتەخت ب پشكدارییا 24 یانەیێن هەرێمێ بۆ ژیێن جودا هێتە كرن، تیما پارێزگەهێ ب ژڤانە بۆ پاراستنا دەستكەفتێ خوە یێ قۆناغا ئێكێ دەمێ شیایی ببیتە قارەمان.
ل دۆر ڤێ قارەمانیێ هشیار فەریق سەرۆكێ ئێگەتیا پایسكلان ل هەرێما كوردستانێ بۆ رۆژناما ئەڤرۆ گۆت: ل دووڤ بەرنامەیێ هاتییە دانان ئەڤرۆ دێ كۆمبوونا هونەری یا یانەیێن پشكدار ل سەر ئاستێ، تازەپێگەهشتی، لاوان، پێشكەفتی و كچان ل هەولێرا پایتەخت هێتە كرن پێخەمەت دیاركرنا رێنما و جهـ و ژڤانێن یارییان ب دانانا نەخشەیێ بەریكانێ ئەوا دێ ل باكۆرێ هەولێرێ ل سەر رێیا باحركێ هێتە ئەنجامدان.
هەروەسا ناڤهاتی گۆت: پشتی سەركەفتنا قۆناغا ئێكێ ئەوا ل خزیرانا بۆری پارێزگەها دهۆكێ مێڤاندارییا وێ كری گەشبینن دێ ئەڤ قۆناغە ژی یا سەركەفتی بیت، شێوازێ قارەمانیێ بتنێ دیاركرنا ئەنجامان ل سەر ئاستێ تاكە هەتا ب دووماهی هاتنا قۆناغا سێیێ دێ قارەمان ل سەر ئاستێ یانەیان دیاربیت پشتی كۆمكرنا هەمی ئەنجامان، دیسان لژنەكا تایبەت هاتیە پێكئینان د ماوێ هەر سێ قۆناغێن قارەمانیێ دا دۆڤچوونا یاریزانێن باش بكەن پێخەمەت درۆستكرنا هەلبژارتیێ كوردستانێ و بەرهەڤی بۆ هەر قارەمانیەكا داهاتی یا نێڤدەولەتی و ڤەكری بیت ئەڤە ژی پێنگاڤەكا باشە یاریزانێن هەرێمێ زێدەتر ئاستێ خوە پێشبێخن و هەڤڕكی پەیدابیت.
بۆ زانین تیما تازەپێگەهشتیێن یانەیا دهۆك ب هەرچار یاریزانێن خوەڤە ل سەر ئاستێ تازەپێگەهشتیان بۆ بەریكانەیا 20 كم رێزێن پێشیێ كۆنترۆلكربوون ئەو ژی ئاریوس سلێمان، محەمەد سادق نوری، یوسف جیهاد و یوسف عەرفان.
