ئەڤرۆ زاخۆ ل بەغدا دێ شەڕی بەرانبەر حەشدا شەعبی كەت
دهێتە چاڤەڕێ كرن ئەڤرۆ تیما باسكێت بۆلا یانەیا زاخۆ و نوونەرا كوردستانێ دەست ب هەڤڕكیێن وەرزێ نوو یا خولا پلا نایابا ئیراقێ بكەت دەمێ ل پایتەختێ ئیراقێ بەغدا دبیتە مێڤانا یانەیا حەشد شەعبی د چارچووڤەیێ گەڕا ئێكێ ئەوا دێ ل دەمژمێر شەشی ئێڤاری ل هۆلا گرتییا شەعب یا نێڤدەولەتی هێتە كرن.
كوڕێن خابووری ب زاخەكا مەزن و بەرهەڤیێن باش دێ هێنە دناڤ خولێ دا تایبەت پشتی هاتنا هەردو ستێرێن وێ یێن پیشەكار ژ وەلاتێ ئەمریكا رەشاد جاكسۆن و بریلاند والتۆن، دگەل كۆمەكا باش یا كوڕێن باژێرێ خوە ب سەركێشییا كاپتنێ تیمێ جەگەر عەلی و هەردو برایێن وی موراد و محەمەد، دیسان زنار هوشیار و محەمەد زییا، د دیرۆكا یاریێن هەردو یانەیان دا حەفت جاران بەرانبەر ئێك بووینە زاخۆ دو سەركەفتن و پێنچ خوسارەتی تۆماركرینە، بۆ زانین ل سەر ئاستێ تازەپێگەهشتییان ژی تیما یانەیا زاخۆ دێ ل دەمژمێر چارێ ئێڤاری ل هەمان هۆل یارییا خوە دگەل حەشد شەعبی كەت.
ل دۆر دووماهی بەرهەڤیێن تیما زاخۆ جوتیار عەلی هاریكارێ راهێنەری بۆ رۆژنامەیا ئەڤرۆ گۆت: یارییا ئەڤرۆ یا ب سانەهی نابیت و ئێك ژ هەڤڕكێن مە یێن خولێ یانەیا حەشدە، لێ بەرهەڤیێن مە بۆ یاریێ د ئاستەكێ باش دانە و ئەم دێ بزاڤێ كەین ب پلانێن تایبەت كونترۆلا یاریێ بكەین و بشێن خالان تۆماربكەین و نەهێلین ئەو كار ل سەر هێرشێن بلەز و هەڤدژ بكەن.
ژلایەكێ دووڤە عەبدولستار عەلی سەرپەرشتێ تیمێ بۆ رۆژنامەیا ئەڤرۆ گۆتبوو: مە باوەرییەكا مەزن ب كوڕێن خابووری هەنە، هەمی یاریزانێن مە بۆ دەمەكێ درێژە یاریێ دگەل ئێك دكەن و هەماهنگی و لێك تێگەهشتنەكا باش دناڤبەرا واندا پەیدابوویە گەشبینن بۆ ئاست و ئەنجامێن دلخوەشكەر.
