د. خالد نەجم: پاشئێخستنا یاریێن زاخۆ د بەرژوەندییا وێ دایە
فیدراسیۆنا باسكێت بۆلا ئیراقێ ب فەرمی بۆ ماوەیێ نێزیكی مەهەكێ یاریێن سێ یانەیێن پشكدار د خولا پلا نایاب دا راوەستاندن ژ وانا تیما یانەیا زاخۆ یە، بەرانبەر دا د ڤێ حەفتیێ گەڕا دویێ دێ بەردەوام بیت.
د. خالد نەجم سكرتێرێ فیدراسیۆنا باسكێت بۆلا ئیراقێ بۆ رۆژنامەیا ئەڤرۆ گۆت: بڕیار هاتیە دان یاریێن هەرسێ یانەیێن زاخۆ، دیفاع ئەلجەوی و دیجلە ژ چارچووڤێ گەڕا دویێ یا خولا پلا نایابا بۆ ماوەیێ نێزیكی 20 هەتا 25 رۆژانان بهێنە راوەستاندن ژبەر پشكداریێن یانەیێن دیفاع ئەلجەوی و دیجلە د قارەمانییا عەرەبی و رۆژئاڤا ئاسیا دا.
ل دور ئەگەرێ پاشئێخستنا یارییا زاخۆ ناڤهاتی گۆت: هەرچەندە د وی دەمی دا چو پشكداریێن دەرڤە نابن، لێ ل سەر داخوازا تیما دیجلە كو یاریزانێ زاخۆ موراد عەلی ب شێوەیێ خواستن بۆ قارەمانیێ ل سەر پێكهاتیێ تیما خوە زێدەكرییە، ژبەركو یاریزانەكێ خودان شیانە و شارەزایە و دێ مفایی گەهنیتە نوونەرا مە یا ئیراقێ، د بەرانبەر دا نە پشكدارییا موراد عەلی دگەل تیما خوە د خولێ دا دێ كارتیكرنێ ل سەر ئاست و ئەنجامێن تیما زاخۆ كەت و ئەڤچەندە ژی ئەم رازی نابیت كارتیكرن ل سەر تیما زاخۆ بكەت ئێك ژ تیمێن هەڤڕك و هێزا خولێ یە، لەوما بڕیار هاتییە دان بۆ بەرژوەندییا یانەیا زاخۆ یارییا وان یا گەڕا دویێ دبیت هندەك یاریێن دووڤدا ژی ی ژ خولێ بهێنە پاشئێخستن هەتا تیما دیجلە ڤەگەڕێت و پێشبینی دكەم دناڤبەرا 20 هەتا 25 رۆژان ئەڤ راوەستیانە یا بەردەوامبیت.
بۆ زانین تیما یانەیا زاخۆ د یارییا ئێكێ یا دەستپێكرنا وەرزێ نوو 2023-2024ێ شیان سەركەفتنەكا باش ل سەر هەڤڕكا خوە یانەیا حەشد ئەلشەعبی بینن ب 74 – 69 خالان، د یارییا واندا ئەوا ل حەفتیا بۆری ل هۆلا شەعب پایتەختێ ئیراقێ بەغدا هاتیە كرن، نوونەرا كوردستانی بۆ بهێزترنا تیما خوە گرێبەست دگەل هەردو ستێرێن پیشەكار ژ وەلاتێ ئەمریكا ئیمزاكرینە ئەو ژی رەشاد جاكسۆن و بریلاند والتۆن.
