ب پشتەڤانییا مەسرۆر بارزانی بەرهەڤیێن كوردستانێ بۆ قارەمانییا كۆنیفا بەردەوامن
فیدارسیۆنا تەپا پێی یا هەرێما كوردستانێ ل سەر بەرهەڤیێن خوە بۆ مێڤانداریكرنا قارەمانییا نێڤدەولەتی یا هەلبژارتیێن هەرێمێن جیهانێ بەردەوامن ئەوا بڕیارە هەڤڕكیێن وێ ل هاڤینا سالا 2024ێ ل چەند یاریگەهێن وەرزشی یێن كوردستانێ بهێتە كرن.
ئازاد محەمەد ئەندامێ فیدارسیۆنا تەپا پێی یا هەرێما كوردستانێ تایبەت بۆ رۆژناما ئەڤرۆ دیار كر ب پشتەڤانییا سەرۆكێ حوكمەتا هەرێما كوردستانێ مەسرۆر بارزانی بەرهەڤیێن مە بۆ مێڤانداریكرنا قارەمانییا كۆنیفا یا هەرێمان بەردەوامە كو ئەڤ پشتەڤانییە دێ بیتە ئەگەرێ سەرەكی و مەرەم ژی زێدەتر ناساندنا هەرێما كوردستانێ ب كەلەتۆر و دیرۆكا خوە بۆ هەموو هەرێمێن جیهانێ بهێتە دیاركرن و كوردستان ژی حەز و ڤیانا وەرزشێ هەیە و دیسان بلندكرنا ئاستێ وەرزشا تەپا پێی و گۆت: ل دووماهییا حەفتییا بۆری كۆمبوونەكا بەرفرەهـ یا فیدراسیۆنا كوردستانێ دگەل سەرۆكێ فیدراسیۆنا كۆنیفا یێ سویدی پێر ئەندرێس بیلێند و چەند ئەندامێن كۆنیفایێ ب شێوەیێ ئۆنلاین ب ل دۆر دووماهی بەرهەڤیێن كوردستانێ بۆ مێڤانداریكرنا قارەمانییا كۆنیفا ل سەر ئاستێ هەلبژارتیێن هەرێمان ئەوا دێ ل هاڤینا سالا بهێت ب پشكداریی 16 هەلبژارتییان دەستپێكەت، چەند بابەتێن گرێدایی ب هاتنا تیمێن مێڤان بۆ كوردستانێ و قۆناغێن برێڤەبرنا قارەمانیێ و دانانا بەرنامە و سیستەم و لژنەیێن هەڤپشك بۆ سەركەفتنا قارەمانیێ.
هەروەسان ناڤهاتی گۆت: پشتی ل ئادارا بۆری شاندێ فیدراسیۆنا تەپا پێی یا هەرێمێن جیهانی سەرەدانا پارێزگەهێن دهۆك، هەولێر، سلێمانی و ئیدارا سەربەخوەیا زاخۆ كربوون ژبۆ دیتن و دووڤچوونا هەر پێنچ یاریگەهێن وەرزشی ل سەر ئاستێ هەرێمێ دگەل ژێرخانەیا وەرزشی، ئۆتێل وجهێن پێدڤی وەكو بادەكا هەرێما كوردستانێ، هەر ژ دیتنا دەستپێكی رازەمەندی ل سەر هاتبووكرن و كەیفخوەشیا خوە دیار كر كوردستان ژ هەموو هەرێمێن دیتر یا بەرهەڤە بۆ مێڤانداریێ و گونجای ترە.
چەند هەلبژارتی دێ پشكداربن؟
ل دووڤ لیستەیا بەلاڤبوویی ژ فیدراسیۆنا كۆنیفایێ 48 هەلبژارتی دێ هەڤڕكیێ بۆ 15 پلێتنێن دەربازبوونێ بەر ب قارمانیا كۆنفایی كەن، دگەل هەلبژارتیێ مێڤاندار دێ بنە 16 هەلبژارتیی كو دووڤ هژمارا تیما بۆ هەموو كێشوەران هاتینە بەلاڤكرن بڤی رەنگی: ژ ئۆرۆپا شەش هەلبژارتی، ئەمریكا باشۆر دو، ئاسیا دو، ئەمریكا باكۆر ژی دو و هەر ئێك ژ كێشوەرێ ئەفریقیا، ئۆقیانۆس دێ پشكداربن، دگەل هەلبژارتیێ مێڤان، هەرچەندە ل كێشوەریێن ئۆرۆپا، ئاسیا، ئەمریكا باشۆر و باكۆر دگەل ئەفریقا رێژا هەلبژارتیان زێدەترن لێ لدووڤ سیستەمێ هاتیە دیاركرن دێ ئەو دناڤبەرا خوە دا ڤاڤارتنان كەن ژبۆ وەرگرتنا پلێتێن دەربازبوونێ.
سیستەمێ قارەمانیێ و مێڤانداریێ
ئێكەتیا كۆنیفایێ دیار كربوو شێوازێ قارەمانیێ دێ ل سەر چار كۆمان هێنە بەلاڤكرن ل پێنچ یاریگەهێن باژێرێن كوردستانێ هاتینە دەستنیشانكرن لێ دێ بڕیارا دووماهیێ پشتی رازیبوون دهێتە وەرگرتن دێ دیاربیت كو چاوانیا بڕێڤەبرنێ و بەلاڤكرنا هەر كۆمەكێ ل كێش یاریگەهێ بیت.
بۆ زانین قارەمانیا كۆنیفا یا هەرێما ل سالا 2014ێ دەستپێكر بوو، ئەوا هەر دو سالان جارەكێ ل هەرێمەكا وەلاتێن جیهانێ دهێتە رێكخستن، ئەڤ قارەمانیە دبیتە یا پێنجێ پشتی دووماهی قارەمانی ل 2020 ژبەر كۆرۆنایێ بۆ ماوەیێ چار سالە هاتیە راوەستاندن.
