ئاكرێ‌ ئارمانجا خوە بۆ نایابا كوردستانێ‌ دیار كر

ئاكرێ‌ ئارمانجا خوە بۆ نایابا كوردستانێ‌ دیار كر

65

بۆ ماوەیێ‌ نێزیكی مەهەكە تیما تەپا پێی یا یانەیا ئاكرێ‌ دەست ب راهێنانان كرییە خوە بەرهەڤكرن بۆ وەرزێ‌ نوو یێ‌ خولا پلا نایابا كوردستانێ‌ ئەوا دهێتە پێشبینیكرن ل دەستپێكا چڕییا دویێ‌ یا بهێت دەستپێبكەت.
هۆزەڤان زاهد ئەندامێ‌ كارگێرییا یانەیا ئاكرێ‌ بۆ رۆژنامەیا ئەڤرۆ گۆت: تیما مە ب سەرپەرشتییا راهێنەرێ‌ رەكەز سوری یونس سلێمان و هاریكارێ‌ وی كوڕێ‌ باژێرێ‌ ئاكرێ‌ هەژار سابر و راهێنەرێ‌ گۆلپارێزان فەرید سەفا ناجی و یێ‌ شیانێن چەستەیی د. ئەوس محەمەد ئەلحیجازی هەر ژ 17ێ‌ مەها بۆری دەست ب بەرهەڤییان كریە و چەند یاریزانێن ئاست بلند و شارەزا هاتینە دناڤ رێزێن پێكهاتیێ‌ تیمێ‌ دا ژبۆ باشترین بەرهەڤی بۆ وەرزێ‌ نوو ئەوا مە پلان دانایی نە بتنێ‌ پشكداربین بەلكو هەڤڕكیێ ژی ل سەر رێزێن ئێكێ‌ هەتا ناسناڤی ژ بكەین سەرباری یانەیێن دی ژی بەرهەڤیێن باش هەنە.
هەروەسان ناڤهاتی گۆت: گەشبینین بۆ وەرزێ‌ ئەڤ سالە ب شێوەكێ‌ جودا و باشتر پشكداری خولا كوردستانێ‌ بیت، تایبەت پشتی بەرێز مەسرۆر بارزانی سەرۆكێ‌ حوكمەتا هەرێما كوردستانێ‌ بەرهەڤییا خوە بۆ پشتەڤانییا یانەیا ئاكرێ‌ دیار كری و بڕیار دایی یاریگەها مە بهێتە نووژەنكرن ئەڤچەندە ژی وەكر پلانێن مە ژ پشكداریێ‌ بەر ب هەڤڕكیێ‌ د ناڤ خولێ‌ دا بكەت، بڤێ‌ چەند فەر دبینم سۆپاسییا جەنابێ‌ وی دكەین د یسان دۆڤچوون و پشتەڤانییا بەردەوام یا لەقا نەهـ ل ئاكرێ‌ یا پارتی دیمۆكراتی كوردستانی، لەوما دێ‌ بەردەوامبین و رژدبین ناڤێ‌ باژێرێ‌ خوە د خولا نایابا كوردستانێ‌ بلند بكەین.
بۆ زانین ل ڤێ‌ دووماهیێ‌ یانەیا ئاكرێ‌ دو هێرشبەرێن نوو ئیناینە دناڤ رێزێن تیما خوە دا ئەو ژی جەوهەر نەجم ژ یانەیا شەقلاوە و موسا عەدنان ژ یانەیا دیوانییە ئەوێ‌ بەری نوكە ل یانەیێن نەفت و تەلەبە یێن بەغدایی بوو.

کۆمێنتا تە