كۆڤان حەسەن: شانازییە جودا دگەل سێ یانەیێن پارێزگەهێ دەستكەفتێن دیرۆكی تۆمار كرینە
د دیدارەكێ دا كۆڤان حەسەن كوڕێ باژێرێ دهۆكێ و یاریزانێ تیما یانەیا تەناهی دیار كر شانازیێ ب ئەوێ چەندێ دبەت وەكو یاریزانێ تەپا پێی دگەل سێ یانەیێن پارێزگەها دهۆكێ جودا دەستكەفتێن دیرۆكی تۆماربكەت و بۆ وەرزێ بهێت ژی بەرهەڤە یاریێ بكەت.
زێدەتر ناڤهاتی گۆت: دەستڤە ئینانا هەر ناسناڤەكی یان دەستكەفتەكێ دیرۆكی د كاروانێ یاریزانی دا دبیتە جهێ شانازیێ ژبەر كو ئەو زەحمەتا چەندی سالان ب راهێنانێ و ئەنجامدانا یاریان پێخەمەتی دەستڤە ئینانا هەر دەستكەفتەكی یا ناسناڤەكی یە، ئەز ژی شانازیێ ب ئەوێ دەستكەفتی دبەم كو جودا یاریزانێن سێ یانەیێن پارێزگەهێ بوویمە و دگەل هەڤالێن خوە شیایینە ئارمانجا كارگێری و جەماوەرێ یانەیێ بجه بینن، ل دەستپێكێ دگەل یانەیا گارە و دووڤدا سێمێل و وەرزێ بۆری دگەل یانەیا تەناهی بوو، پشتی زەحمەتكا مەزن شیایین دگەل هەر یانەكێ بۆ وەرزێن جودا تیما تەپا پێی ژ پلا دو یا كوردستانێ دەرباز بكەینە پلا ئێك و ئەڤ دەستكەفتە ژی جهێ شانازیێ یە و دیرۆكەكا شانازیێ یە د كاروانێ من یێ تەپا پێی دا.
ژلایەكێ دووڤە كۆڤان حەسەن رژدییا خوە دیار كر بۆ خوە بەرهەڤكرن بۆ وەرزێ بهێت و گۆت: دبیت هندەك هزر بكەن ئەو ئاست و شیانێن وەرزێن بۆری من نە ماینە لێ رژدم و دێ بەلگە سەلمینم كو هێشتا شیانێن ماین و دێ بەردەوام یاریێ د ناڤ یاریگەهێن تەپا پێی كەم و هندی باوەری ب شیانێن خوە هەبیت و بۆ وەرزێ بهێت ژی ئامادەیە، رۆژانە ئەز راهێنانان دكەم پێخەمەت پاراستنا سەنگ و چەستەییا خوە و باشترین شێوە بەرهەڤی وەرزێ نوو بم.
