دهۆك دێ قارەمانییا ئیراقێ یا باسكێت بۆلێ مێڤان كەت
قەیس وەیس:
د داخویانیەكێ دا سكرتێرێ فیدراسیۆنا كیك بۆكسینگا ئیراقێ دیار كر ب فەرمی رازیبوون ل سەر مێڤانداریكرنا پارێزگەها دهۆكێ بۆ یاریێن دووماهییا قارەمانییا یانەیێن ئیراقێ ل سەر ئاستێ لاوان مێڤان بكەت، ئەوا بڕیار هاتییە دان ل دەستپێكا چرییا دویێ یا بهێت دەستپێبكەت.
زێدەتر د. خالد نەجم بۆ رۆژنامەیا ئەڤرۆ گۆت: د دووماهی كۆمبوونا فیدراسیۆنا باسكێت بۆلا ئیراقێ چەند بڕیار و راسپاردە هەبوون ژ وانا ل سەر داخوازییا یانەیا دهۆك یا وەرزشی رازیبوون بۆ مێڤانداریكرنا پارێزگەها دهۆكێ یا قارەمانییا لاوان ئەوا بڕیار ژی بۆ هاتییە دان ل ئێكی چرییا دویێ یا بهێت ل هۆلا گرتییا یانەیا دهۆكێ بهێتە كرن ئەوا دێ حەفت یانە پشكداربن ئەو ژی، دهۆك، دەربەندیخان، ئەلەحرار، ئەلفورات، ئەلموستەقبل ئەلموشرق، ئەلتەزامن و ئەلدیوانییە، كۆمبوونا هونەری دێ بەری قارەمانیێ ب رۆژەكێ یان دو رۆژان بیت ئەو ژی ل دووڤ كاودان و ژڤانێ قارەمانیێ.
ژلایەكێ دووڤە د. خالد نەجم كەیفخوەشیا خوە دیار كر دۆبارە یانەیا دهۆك یا ڤەدگەڕێتە د ناڤ چالاكیێن باسكێت بۆلا ئیراقێ دا و گۆت: یانەیا دهۆك سەنگا خوە یا د ناڤ خولێ دا هەیی تایبەت ل سەر ئاستێ پێشكەفتییان و دەستڤە ئینانا پێنج ناسناڤێن خولا پلا نایابا ئیراقێ و پشكداریێن وێ یێن رۆژئاڤا ئاسیا و قارەمانییا ئاسیا و دەستڤە ئینا رێزا سێیێ ل سەر ئاستێ ئاسیا بەلگەیە، ب هیڤی نە وەرزێ بهێت یانەیا دهۆك د ناڤ خولا پێشكەفتیان ب هێز ببین، گەشبینم قارەمانییا لاوان ل دهۆكێ دێ یا سەركەفتی بیت ژبەركو خالێن سەركەفتنی یێن ل پارێزگەهێ هەیین تایبەت ژێرخانەیا وەرزشی.
