یانەیا تەناهی دێ پشتا خوە ب هێزا لاوان گەرم كەت
ب شێوەكێ فەرمی كارگێرییا یانەیا تەناهی سپێرا خوە ل سەر كۆمەكا لاوان پارێزگەهێ دگەل راهێنەرێ گۆلپارێز یێ خودان سەربۆر دا ب كادرێ راهێنانێ بۆ وەرزێ نوو 2023-2024ـێ یێ خولا پلا ئێكا كوردستانێ یا تەپا پێی دكەت.
جاسم شەعبان سەرۆكێ یانەیا تەناهی بۆ رۆژنامەیا ئەڤرۆ گۆت: ژبۆ خوە بەرهەڤكرن بۆ وەرزێ نوو یێ خولا پلا ئێكا كوردستانێ ب فەرمی گەهشتینە رێكەفتنێ دگەل كۆمەكا گەنجێن خودان شیان دارڤان خالد دوبارە باوەری پێ هاتە دان وەكو راهێنەرێ تیمێ دگەل دا هەر ئێك ژ ئۆمێد ئەحمەد و زەكی مەهدی هاریكارێن راهێنەری كو هەردو ژی بەرنیاسن و خودان ئەزمۆن و شیانێن پێشكەفتی یێن هەین، دیسان وەكو وەرزێ بۆری مە باوەری دا تەحسین خورشید راهێنەرێ گۆلپارێزان ئەوێ شارەزاهییەكا درێژ و سەربۆرێن سەركەفتی هەیین، سپێرا مە ل سەر ئەڤی كادرێ دێ هێزەكا مەزن دەتە تیمێ سەرباری دەم یێ كورتە لێ ئەوان ژی پلان و بەرنامەیێن رێكخستی یێن هەین ژبۆ كاروانەكێ سەركەفتی.
ژلایەكێ دووڤە ناڤهاتی ئەركێ تیما خوە د خولا پلا ئێك دا ب زەحمەت دبینیت و گۆت: دێ چاڤەڕێ پارێزگارێ دهۆكێ بین كو گشەبینی دایە مە بۆ پشتەڤانیێ، لەوما ل دووڤ ئەوێ پشتەڤانییا دارایی بشێن پشكدارییەكا سەرفەراز و سەركەفتی بكەین و دێ هەمی فۆكسا مە دێ ل سەر گەنج و لاوێن دەڤەرێ بیت، هەمی یاریزانێن مە یێن وەرزێ بۆری د نوكە دا راهێنانان دكەن ژبلی دو یاریزانان، پشتی سەقفێ پشتەڤانییا دارایی بۆ مە دهێتە دیاركرن ژ نوو دێ دگەل یاریزانێن خوە كۆمبین بۆ ئیمزاكرنا گرێبەستێن وان، ب هیڤی نە وەرزێ ئەڤ سالە تەناهی ببیتە هژمارەكا بهێز دخولێ دا.
