باسكێت بۆلا زاخۆ بەرانبەر حللە دێ بزاڤێن قەرەبووكرنێ كەت
بڕیارە ئەڤرۆ هەردو تیمێن باسكێت بۆلا یانەیا زاخۆ ل سەر ئاستێ پێشكەفتیان و تازەپێگەهشتییان یاریێن خوە یێن گەڕا چارێ ژ هەڤڕكیێن خولا پلا نایابا ئیراقێ د ناڤ ئەرد و جەماوەرێ خوە دا ب رژدییا سەركەفتنێ و قەرەبوویا خوسارەتییا یارییا بۆری و ئاشتكرنا جەماوەرێ خوە.
ل دەمژمێر پێنجێ ئێڤاری كوڕێن خابووری یێن ئاستێ پێشكەفتییان دێ ل هۆلا گرتییا بنگەهێ وەرزشی ل باژێرێ زاخۆ مێڤاندارییا یانەیا حللە د یارییەكا ب هێز و هەڤڕكی دا كەت، زاخۆ د یارییا بۆری دا بەرانبەر شورتە ب71-59 خالان تووشی خوسارەتیێ بوو، ژلایێ خوەڤە حللە سەركەفتن ل سەر حەشد ئەلشەعبی ئینابوو ب100-91 خالان.
جوتیار عەلی هاریكارێ راهێنەرێ زاخۆ بۆ رۆژنامەیا ئەڤر گۆت: بۆ ڤێ یاریێ بەرهەڤیێن باش هاتینە كرن و هەمی یاریزان بەرهەڤن، پشت گەرمیێ ب ستێرێن خوە یێن پیشەكار و كوڕێن باژێرێ زاخۆ دكەین، مە جەماوەرەكێ دلسۆز و ب ڤیانا یانەیا زاخۆ ڤە هەیە دێ بەرهەڤبن و وەكو هەر جار پشتەڤانێن مە بن، ب هیڤی نە ئەڤرۆ سەركەفتنێ بینن و بەردەوامیێ بدەینە ئەنجامێن باش.
ژلایەكێ دووڤە ل دەمژمێر دو یێ پشتی نیڤرۆ تیما تازەپێگەهشتییان دێ یارییا خوە بەرانبەر تازەپێگەهشتیێن حللە ل هەمان هۆل ئەنجامدەت.
بۆ زانین تیما زاخۆ ل سەر ئاستێ پێشكەفتییان دو سەركەفتنا ل دووڤ ئێك د خولێ دا بینت ل سەر هەر ئێك ژ حەشد ئەلشەعبی 74- 69 خالان و یارییا دویێ دگەل نەفت ئەلشیمال ب 112-65 خالان سەركەفتن ئینا و یارییا سێیێ دگەل شورتە تووشی خوسارەتیێ بوو.
