راهینەرێ یانەیا دهۆک: هەمی یاریزان بەرهەڤن و دێ بزاڤێن سەركەفتنا دویێ كەین
دهێتە چاڤەڕێ كرن ئەڤرۆ چار یاری ژ چارچووڤێ گەڕا دویێ یا هەڤڕكیێن خولا ستێرێن ئیراقێ یا پیشەكاران بهێنە ئەنجامدان، تیما تەپا پێی یا یانەیا دهۆك دێ یارییا خوە یا دویێ ژ دەرڤەیی یاریگەها خوە بەرانبەر یانەیا نەورۆز ل باژێرێ سلێمانیێ بیت.
ئەڤرۆ ل دەمژمێر سێ ئێڤاری تیما دهۆكێ دێ یارییەكا ئاگرین بەرانبەر خودانێن ئەردی یانەیا نەورۆز ئەنجامدەت كو دهێتە هژمارتن ئێك ژ دێربیێن كوردستانی، هەردو یانە د یارییا ڤەكرنا خولا ئیراقێ دا شیابوون سەركەفتنێ بینن، تیما دهۆك د ناڤ ئەرد و جەماوەرێ خوە دا ب ئاست و ئەنجام ب دو گۆلان بێ بەرانبەر سەركەفتن ل سەر هەلگرا ناسناڤێ وەرزێ بۆری یانەیا شورتە ئینابوو، ئەڤ سەركەفتنە مۆرالەكا بلند داییە یاریزانان و زاخا وان بلند كرییە، لێ بەرانبەر دا یانەیا نەورۆز ژی شیابوو سەركەفتنێ ل سەر یانەیا زەورا ل باژێرێ بەغدا بینیت ب دو گۆلێن پاقژ، لەوما یارییا ئەڤرۆ دێ ئاگرین بیت و شەڕ هەتا دووماهی خولەك هەبیت.
یاریزانێن تیما یانەیا دهۆك د یارییا بۆری دا ئاستەكێ باش نیشان دابوو، بۆ ڤێ یاریێ پێشبینی دهێتە كرن راهێنەرێ تیمێ دێ پشت گەرمیێ ب ستێرێن خوە كەت، یانیك زاكێری، هێران ئازاد، رۆبێن ئاكۆا، مۆسێس لۆكاس، سیابەند عەگید، لێ ژبەر كارتا سۆر محەمەد سەعید بۆ ڤێ یاریێ پشكدار نابیت، هەروەسان د هێتە پێشبینیكرن كۆمەكا باش یا جەماوەرێ دهۆكێ ل یاریگەها نەورۆز بەرهەڤبیت بۆ پشتەڤانییا تیما بەر ب سەركەفتنا دویێ د خولێ دا.
ل دۆر ڤێ یاریێ سلێمان رەمەزان راهێنەرێ تیما دهۆكێ بۆ رۆژنامەیا ئەڤرۆ گۆت: بەرهەڤیێن مە گەهشتینە ئاستەكێ گەلەك باش، هەمی یاریزان بەرهەڤن ژبلی محەمەد سەعید ئەوێ ژبەر كارتا سۆر ناكەت، ب هیڤی نە و دێ بزاڤێ كەین سێ خالا و سەركەفتنا دویێ بدەستڤە بینن.
ژلایێ خوەڤە هەولێر دێ بزاڤێ كەت سەركەفتنا ئێكێ د خولێ دا بینت دەمێ دبیتە مێڤانا یانەیا ئەلقاسم ل یاریگەها كوت، كوڕێن كەلهە و منارە د یارییا ئێكێ دا بەرانبەر مێڤانا خوە نەفت یا بەغدایی ب گۆلەكێ وەكهەڤبوو، ژ یاریێن دی یێن ئەڤرۆ شورتە- كەربلا، نەفت ئەلمیسان- زەورا، نەفت ئەلوەسەت- جەوییە.
