مێسی بۆ جارا هەشتێ ب باشترین یاریزانێ جیهانێ هاتە خەلاتكرن
ب فەرمی ستێرێ ئەنتەر میامی یا ئەمریكی و هەلبژارتیێ ئەرجەنتین لیۆنێل مێسی خەلاتێ باشترین یاریزانێ جیهانێ بۆ سالا 2023ێ ب دەستخوەڤە ئینا، د ئاهنگەكا تایبەت دا ئەوا هژمارەكا مەزن ژ ستێر و بەرپرسێن وەرزشی ل جیهانێ ل شەڤا دوشەمبییا دەربازبوویی ل پایتەختێ فرەنسا پاریس بەرهەڤبووین كو سالانە ژلایێ گۆڤارا فرانس فۆتبۆل یا فرەنسی ڤە سالانە دهێتە رێكخستن.
• خەلاتێ باشترین یاریزان
بۆ جارا هەشتێ یە لیۆنێل مێسی خەلاتێ باندۆر دەستڤە دئینیت و پێشكەفت ل سەر هەڤڕكێ خوە یێ نەرویجی و مانچستەر ستی یا ئنگلتەرا ئیرلینگ هالاند و یێ فرەنس و پاریس سانجێرمان كێلیان مباپی، بۆ زانین لیۆنێل مێسی ل سالێن 2009، 2010، 2011، 2012، 2015، 2019 و 2021ـێ ب دەستڤە ئینایە.
• خەلاتێ باشترین یاریزانا كچ
ستێرا ئسپانی و یانەیا بەرشەلۆنا ئایتانا بۆنماتی وەكو باشترین یاریزانا كچ ل سەر ئاستێ جیهانێ هاتە خەلاتكرن، بۆ زانین هەڤالا وێ ئەلێكسیا بۆتیاس سێ جاران ئەڤ ناسناڤە ب دەستڤە ئینایە.
• خەلاتێ یاشین
ئیمیلیانۆ مارتینێز گۆلپارێزێ هەلبژارتیێ ئەرجەنتین و ئاستۆن ڤێلا یا ئنگلتەرایێ ب خەلاتێ یاشین وەكو باشترین گۆلپارێزێ جیهانێ هاتە دەستنیشانكرن، یاشین ناڤێ گۆلپارێزێ هەلبژارتیێ ئێكەتییا سوفیەتی بوو ل سالا 1954 هەتا 1971ێ یاری كریە، ژبەر شیانێن وی بناڤێ گۆلپارێزێ تەڤنەپیرك هاتبوو نیاسین.
• خەلاتێ ریمۆن كۆپا
یاریزانێ ئنگلتەرا و یانەیا ریال مەدرید جۆد بیلینگهام خەلاتێ ریمۆن كۆپا یێ باشترین یاریزانێ گەنج ل سەر ئاستێ جیهانێ ب دەستڤە ئینا پێشكەڤت ل سەر هەڤڕكێن خوە یێن یانەیا بەرشەلۆنا جاڤی، بێدرێ و ئالیخاندرۆ بالدی و هەڤالێ خوە یێ ریال مەدرید ئیدواردۆ كاماڤینگا، ریمۆن كۆپا ناڤێ یاریزانەكێ گەنجە ل فرەنسا هەر ژ سالێن 1951 هەتا 1967 ئێك ژ باسترین یاریزانێن گەنج دهاتە نیاسین.
• باشترین یانە
خەلاتێ باشترین یانە ل سەر ئاستێ ئافرەتان بۆ یانەیا بەرشەلۆنا هاتە دان، پشتی ناسناڤێ خولا ئسپانیا و چامپیۆنز لیگ ب دەستڤە ئینایی، دیسان ل سەر ئاستێ كوڕان یانەیا مانچستەر ستی هاتە خەلاتكرن پشتی دەستڤەئینانا كۆپا و ناسناڤێ خولا ئنگلتەرا و چامپیۆنزلیگ.
• خەلاتێ گێرهارد مۆلەر
ستێرێ نەرویجی و یانەیا مانچستەر ستی یا ئنگلتەرایێ ئیرلینگ هالاند خەلاتێ گێرهارد مۆلەر وەكو باشترین گۆلكەر وەرگرت، د ئێك وەرز دا دگەل هەلبژارتیێ وەلاتێ خوە و یانەیا ئنگلتەرایێ شیا 56 گۆلان تۆماربكەت، بۆ زانین گێرهارد مۆلەر هێرشبەرێ ئەلمانی بوو ل سالا 1970 گۆلكەرێ مۆندیالێ بوو ب دەه گۆلان د دەمێ خوە دا 68 گۆل تۆماركربوون و خودانێ 14 گۆلان ل سەر ئاستێ مۆندیالان بوو.
• خەلاتێ سوقرات
ڤێنێسیۆس جۆنیرۆ ستێرێ بەرازیلی و یانەیا ریال مەدرید خەلاتێ سوكرات بۆ كارێن خێرخوازی وەرگرت، دەرئەنجامێن كارێن وی یێن خێرخوازی ژ وانا ڤەكرنا پەیمانگەها فێركرنێ و خواندنێ بۆ قوتابیێن فەقیرل بەرازیل ب كۆژمەیێ نێزیكی سێ ملیۆن یۆرۆیان تەرخانكریە كو دێ ل 2024ێ ب دووماهی هێت.
بۆ زانین خەلاتێ باشترین یاریزان یێ فرانس فۆتبۆل جار ئێكێ ل سالا 1956 هاتبوو بەلاڤكرن، ساتنلی ماتیوس یاریزانێ بلاكبێرن یێ ئنگلترایی وەكو باشترین یاریزان خەلات وەرگرتبوو و هەتا نوكە 67 خەلات بۆ باشترین یاریزانێن جیهانێ هاتینە دان، رێژا مەزن ل بەر لیونێل مێسی كەفتیە ئەوژی هەشت جاران و كریستیانۆ رۆنالدۆ پێنچ جاران دەستڤە ئیناینە، هەر ئێك ژ میشێل پلاتینی، یۆهان كرۆیف و ماركۆ ڤان باستن سێ جاران هاتینە خەلاتكرن، بوهایێ تەپا زێری دگەهیتە سێ هزار یۆرۆیان و سەركەفتی 20 هزار یۆرۆیان وەردگریت.
