هەژمارەكا پڕۆژەیان ل ناوچەداریا بجیلێ دهێنە بجهئینان
صەباح زوهێر زێبارێ:
رێڤەبەرێ ناوچەداریا بجیلێ یا سەر ب دەڤەرداریا ئاكرێ ڤە بۆ روژناما ئەڤرۆ دیار كر، هەژمارەكا پرۆژەیان ل ناوچەداریا بجیلێ دهێنە بجهئینان، ژ گرنگتیرن وان پڕۆژەیان ژی رێكێن ناڤخووەیێن ناوچەداریێ و كەلاتێ نە.
بروا فاروق، رێڤەبەرێ ناوچەداریا بجیلێ گۆت: «پڕۆژەیێ رێكێن ناڤخووە ل ناوچەداریا بجیلێ نوكە كار تێدا بەردەوامە و ب رێژەیا 35%ێ پڕۆژە تەمامبوویە و ب گوژمێ 312 ملیۆن دیناران ب درێژاهیا سێ كیلۆمەتران دهێتە بجهئینان، دیسا ل شارەوانیا كەلاتێ ژی رێكێن ناڤخووەیێن كەلاتێ ب گوژمێ 790 ملیۆن دیناران دهێنە چێكرن و هەتا نكە ب رێژەیا نزیكی 30%ێ تەمامبوویە، دیسا پڕۆژەیێ رێكا (ستریان و شەرەفونا و كەندەگول) كو رێكەكا ستراتیژی یە و ب درێژاهیا هەشت كیلۆمەتر و 500 مەتران دهێتە بجهئینان و هەتا نوكە ب رێژەیا 40%ێ تەمامبوویە».
ناڤهاتی گۆتژی: «پڕۆژەیێن ئاڤێ ل گوندێن (زنتا، كێلان، ماندیا ژووری و كیلا سنیان) ب رێژەیا 95%ێ تەمامبووینە، ب تنێ هندەك كارێن تەكنیكی ماینە و ئاریشا كێمئاڤیێ ل وان گوندان دێ چارەبیت».
